ڪراچي (اسٽاف رپورٽر): سنڌ جي وڏي وزير سيد مراد علي شاهه اربع تي آمريڪي سيڙپڪارن کي سنڌ جي معاشي تبديليءَ ۾ طويل المدتي ڀائيوار ٿيڻ جي دعوت ڏني، کين مضبوط سرڪاري مدد، پاليسي جي تسلسل ۽ بين الاقوامي طور تي مڃيل پبلڪ پرائيويٽ پارٽنرشپ فريم ورڪ جي پٺڀرائي سان گڏ هڪ شفاف، قابلِ اڳڪٿي ۽ ڪاروبار دوست ماحول جي خاطري ڪرائي. وزيراعليٰ هائوس ۾ آمريڪا جي هڪ معزز ڪاروباري وفد سان اعليٰ سطحي اجلاس ۾ ڳالهائيندي، مراد شاهه سنڌ جي اسٽريٽجڪ لوڪيشن، مضبوط صنعتي بنياد، ججهن قدرتي وسيلن ۽ انرجي، ٽيڪنالاجي، انفراسٽرڪچر، هيلٿ ڪيئر، ٽورزم، زراعت ۽ لاجسٽڪس ۾ وڌندڙ سيڙپڪاريءَ جي موقعن کي نمايان ڪيو. اجلاس ۾ آمريڪا ۾ قائم ڪاروباري اڳواڻن، سيڙپڪارن ۽ اسپيشل انويسٽمينٽ فيسليٽيشن ڪائونسل (SIFC) جي نمائندن سميت صوبائي وزيرن، سينيئر سرڪاري عملدارن ۽ سنڌ حڪومت جي انويسٽمينٽ ۽ پي پي پي ادارن جي نمائندن شرڪت ڪئي. سيڙپڪاري ۽ پي پي پي تي وڏي وزير جي اسپيشل اسسٽنٽ، سيد قاسم نويد قمر، هڪ تفصيلي پريزنٽيشن ڏني، جنهن ۾ سنڌ جي معاشي طاقتن، سيڙپڪاريءَ لاءِ تيار منصوبن ۽ وڏي پيماني تي پبلڪ پرائيويٽ پارٽنرشپس کي لاڳو ڪرڻ ۾ ڪامياب تجربي کي پيش ڪيو ويو. وفد کي خطاب ڪندي وڏي وزير چيو ته سنڌ پاڪستان جي جي ڊي پي ۾ تقريبن 25 سيڪڙو حصو وجهي ٿي ۽ ملڪ جي سڀ کان وڏي تجارتي ۽ صنعتي مرڪزن جي ميزباني ڪري ٿي، جيڪا ان کي علائقائي ۽ بين الاقوامي مارڪيٽن لاءِ قدرتي گيٽ وي بڻائي ٿي. وڏي وزير چيو سنڌ ڪاروبار لاءِ کليل آهي. اسان جي حڪومت هڪ شفاف، قابلِ اڳڪٿي ۽ سيڙپڪار دوست ماحول کي هٿي وٺرائڻ لاءِ پوريءَ ريت عزمي آهي. هن وڌيڪ چيو اسان ريگيوليٽري سڌارن، سادي ۽ آسان بڻايل طريقيڪارن، ڊجيٽل گورننس جي قدمن ۽ سيڙپڪاريءَ جي راهه ۾ غير ضروري رڪاوٽن کي ختم ڪرڻ لاءِ نجي شعبي سان سرگرم مشاورت ذريعي ڪاروبار ڪرڻ جي آسانيءَ کي بهتر بڻائڻ جاري رکيو آهي. مراد شاهه وفد کي ٻڌايو ته سنڌ قابلِ تجديد توانائي، ٽيڪنالاجي ۽ جديد پيداوار ۾ وڏي صلاحيت رکي ٿي. هن صوبي جي ٿر ۾ ڪوئلي جي وسيع ذخيرن، وڏي پيماني تي هوا ۽ شمسي وسيلن، وڏي ساحلي پٽي ۽ ڪراچي پورٽ ۽ پورٽ قاسم ذريعي اسٽريٽجڪ ڪنيڪٽيٽي ڏانهن اشارو ڪيو. وڏي وزير ڪيترن ئي تبديلي آڻيندڙ قدمن کي نمايان ڪيو جن ۾ مجوزہ ڪيٽي بندر انٽيگريٽيڊ انڊسٽريل اينڊ ميري ٽائيم هب، سنڌ انٽرنيشنل فنانشل سينٽر (SIFC)، گرين انرجي سان هلندڙ ڊيٽا سينٽرز ۽ AI انفراسٽرڪچر، صنعتي ۽ ٽيڪنالاجي زونز، فضلي واري پاڻي جي علاج جون سهولتون، لوڻياٺو پاڻي مٺو ڪرڻ جا منصوبا ۽ صوبي جي ساحلي پٽي سان گڏ سياحت جي ترقي شامل آهن. هن چيو ڇاهي توهان جي دلچسپي ٽيڪنالاجي، هيلٿ ڪيئر، انفراسٽرڪچر، مينوفيڪچرنگ، ڊجيٽل فنانس، زراعت يا اڀرندڙ صنعتن ۾ هجي، سنڌ ترقي ۽ توسيع لاءِ هڪ اسٽريٽجڪ پليٽ فارم فراهم ڪري ٿي. هن سيڙپڪارن کي يقين ڏياريو ته سنڌ حڪومت پروجيڪٽ جي ترقي، منظورين ۽ عملدرآمد ۾ مڪمل سهولت فراهم ڪندي. مراد شاهه چيو صوبي جي چيف ايگزيڪيوٽو جي حيثيت ۾، مان توهان کي موقعن جي جائزي وٺڻ، ڀائيواري قائم ڪرڻ ۽ سيڙپڪاري جي منصوبن کي لاڳو ڪرڻ ۾ سنڌ حڪومت جي مڪمل مدد ۽ سهولت جي خاطري ڏيان ٿو.وڏي وزير سنڌ جي عالمي سطح تي مڃيل پي پي پي پروگرام کي پڻ نمايان ڪيو، ۽ نوٽ ڪيو ته صوبو ايشيا جي اهم پبلڪ پرائيويٽ پارٽنرشپ اختيارن مان هڪ طور اڀري آيو آهي. هن بين الاقوامي طور تي ساراهيل منصوبن جو حوالو ڏنو جن ۾ ٿر ڪوئلي جي ترقي، نبيسر-وائيجهار واٽر سپلائي پروجيڪٽ، ملير ايڪسپريس وي، اين اي ڊي ٽيڪنالاجي پارڪ ۽ مختلف قابلِ تجديد توانائي جا قدم شامل آهن. پريزنٽيشن دوران سيڙپڪارن کي آگاهه ڪيو ويو ته سنڌ ڪاميابيءَ سان هڪ طرف ملين ڊالرز جي ماليت جا پي پي پي پروجيڪٽس مڪمل ۽ شروع ڪري چڪي آهي، جڏهن ته ٻئي طرف ٽرانسپورٽ، پاڻي، توانائي، صنعتي ترقي، سياحت ۽ سماجي شعبن ۾ ملٽي بلين ڊالر جي موقعن جي پائپ لائن کي برقرار رکيو آهي. وفد کي خاص طور تي صنعتي پارڪن، ٿاٻيجي اسپيشل اڪنامڪ زون، اڪواڪلچر ۽ سامونڊي غذا جي برآمدات، گرين ڊجيٽل انفراسٽرڪچر، هيلٿ ڪيئر سروسز، ايمپوزڊ ايجوڪيشن ٽيڪنالاجي، سياحتي ريسارٽس، ويسٽ واٽر ٽريٽمينٽ، ڊي سيلينيشن پلانٽس ۽ قابلِ تجديد توانائي سان هلندڙ ڊيٽا سينٽرز ۾ سيڙپڪاري جي موقعن بابت بريفنگ ڏني وئي. آمريڪي ڪاروباري وفد جي ميمبرن سيڙپڪاري جي فروغ لاءِ سنڌ حڪومت جي سرگرم اندازِ عمل کي ساراهيو ۽ ڪيترن ئي شعبن ۾ موقعا ڳولڻ ۾ سخت دلچسپي جو اظهار ڪيو. ڪاروباري اڳواڻن صوبي جي اسٽريٽجڪ لوڪيشن، وڏي ڪنزيومر مارڪيٽ، صنعتي اڪوسسٽم ۽ وڌندڙ انفراسٽرڪچر نيٽ ورڪ جي تعريف ڪئي. هنن خاص طور تي قابلِ تجديد توانائي جي منصوبن، AI ۽ ڊيٽا سينٽر انفراسٽرڪچر، هيلٿ ڪيئر سيڙپڪاري، فن ٽيڪ، حلن، ٽيڪنالاجي پارڪن، صنعتي زونز ۽ برآمدات تي ٻڌل پيداوار ۾ خاص دلچسپي ڏيکاري. ڪيترن ئي شرڪت ڪندڙن نوٽ ڪيو ته سنڌ جو پي پي پي فريم ورڪ، پاليسي جو تسلسل ۽ سيڙپڪارن سان سڌو سنئون ڳالهين جي خواهش طويل المدتي ڪاروباري ڀائيواريءَ لاءِ هڪ مضبوط بنياد فراهم ڪري ٿي. هنن ريگيوليٽري سهولتن لاءِ حڪومت جي عزم کي پڻ ڀليڪار چيو ۽ فالو اپ اجلاسن ۽ شعبن جي حوالي سان مخصوص روڊ شوز جي ذريعي مخصوص سيڙپڪاري جي موقعن تي بحث جاري رکڻ جي ارادي جو اظهار ڪيو. وفد سنڌ حڪومت ۽ لاڳاپيل کاتن سان ويجهو تعاون برقرار رکڻ تي اتفاق ڪيو ته جيئن بئنڪيبل پروجيڪٽس جي سڃاڻپ ڪئي وڃي ۽ اهڙيون ڀائيواريون قائم ڪيون وڃن جيڪي عملي سيڙپڪاري، روزگار جي پيدائش ۽ ٽيڪنالاجي جي منتقلي ۾ تبديل ٿي سگهن. اجلاس کي پڄاڻي تي رسائيندي، وڏي وزير ان لڳاپي کي سنڌ ۽ آمريڪا جي وچ ۾ طويل المدتي معاشي ڀائيواريءَ جي شروعات قرار ڏنو. هن چيو اسان جو يقين آهي ته ڪامياب ڀائيواريون اعتماد، جدت ۽ گڏيل فائدي تي ٻڌل هونديون آهن. مان توهان کي حوصلا افزائي ڪريان ٿو ته اڄوڪي اجلاس کي هڪ پڄاڻي نه، پر هڪ طويل المدتي ۽ گڏيل طور تي فائدي مند لاڳاپي جي شروعات طور ڏسو. اسان پنهنجي بحث کي عملي قدمن ۾ تبديل ڪرڻ، سنڌ ۽ آمريڪا جي وچ ۾ معاشي لاڳاپن کي مضبوط ڪرڻ، ۽ اهڙا موقعا پيدا ڪرڻ جا منتظر آهيون جيڪي اسان جي ماڻهن ۽ معيشتن لاءِ پائيدار اهميت فراهم ڪن. وڏي وزير آمريڪي سيڙپڪارن کي رهنمائي، مدد ۽ سهولت فراهم ڪرڻ لاءِ انويسٽمينٽ ڊپارٽمينٽ ۾ هڪ فيسليٽيشن ڊيسڪ قائم ڪئي. اجلاس ۾ وائيس پيڊنٽ آپريشنز ماهين شمسي، ٽي ايس آئي انجنيئرنگ انڪ جي صدر مقصود ڪمبوهه، انشور123 جي باني زين جيوانجي، والوڪ جي ٽي سي جي سي اي او پيٽرڪ ايبيل، آمريڪن پاڪستان ايڊوڪيسي گروپ جي صدر علي راشد، فرينڊز آف پاڪستان جي چيئرمين عارف ظفر منصوري، فرينڊز آف پاڪستان جي صدر جمال خواجه، پاڪستان آمريڪن شڪاگو لينڊ چيمبر آف ڪامرس جي صدر نويد انوار، صنعتڪار نعيم زميندار ۽ آمريڪي ڪاروباري برادري جي ٻين اهم ميمبرن شرڪت ڪئي. صوبائي وزير، چيف سيڪريٽري آصف حيدر شاهه، ميئر ڪراچي بيرسٽر مرتضيٰ وهاب ۽ سينيئر سرڪاري عملدار پڻ موجود هئا.
