ڪاراڪاس(ويب ڊيسڪ)وينزويلا ۾ ٻٽي زلزلي سبب ڊهي پٽ ٿيل هڪ عمارت جي ملبي هيٺ 8 ڏينهن تائين ڦاٿل هڪ شخص کي جيئرو ٻاهر ڪڍيو ويو آهي.
هنگامي امدادي ڪارڪنن هرنان گل کي ان وقت بچائڻ ۾ ڪاميابي حاصل ڪئي، جڏهن کيس پهريون ڀيرو ملبي هيٺ ڳولهي لهڻ کان پوءِ 100 ڪلاڪن کان وڌيڪ عرصي تائين مسلسل امدادي ڪارروائي جاري رکي وئي. هو لڳ ڀڳ 140 ٽن ملبي هيٺ ڦاٿل هو.
هڪ چلي جي فائر فائٽر ان کان اڳ بچاءُ واري هن آپريشن کي “بيشڪ منهنجي زندگيءَ جو سڀ کان وڌيڪ پيچيده ۽ فني لحاظ کان ڏکيو آپريشن” قرار ڏنو هو.
24 جون تي وينزويلا ۾ هڪٻئي پٺيان آيل ٻن طاقتور زلزلن ۾ هيل تائين لڳ ڀڳ 2,300 ماڻهن جي فوت ٿيڻ جي تصديق ٿي چڪي آهي، جڏهن ته هزارين ماڻهو اڃا تائين لاپتا آهن.
بچاءُ واري ٽيم کي هرنان گل تائين پهچڻ ۾ 100 ڪلاڪن کان وڌيڪ وقت لڳو، جنهن کان پوءِ آخرڪار کيس ملبي مان صحيح سلامت ٻاهر ڪڍيو ويو.
ڪوسٽا ريڪا ريڊ ڪراس جي پيرا ميڊڪ ايلن ميڊريگل واقعي واري هنڌ صحافين کي ٻڌايو ته هرنان گل هن ڏکئي آزمائشي دور مان “بلڪل صحيح حالت ۾” ٻاهر نڪتو.
ميڊريگل اهو ئي امدادي ڪارڪن هو، جنهن آچر ڏينهن ملبي مان هرنان گل جون تمام ڪمزور مدد لاءِ پڪارون ٻڌيون هيون.
هن ٻڌايو: “اهو انتهائي جذباتي لمحو هو. شروعات ۾ ته مون کي پنهنجي ڪنن تي ئي يقين نه آيو، تنهنڪري مون پنهنجي ساٿي کي چيو ته هو به ٻڌي تصديق ڪري ته مان رڳو وهم ته نٿو ڪريان.”
هن لمحي کان پوءِ امدادي ڪارڪنن سيڪيورٽي گارڊ کي جلد کان جلد ٻاهر ڪڍڻ لاءِ ڏينهن رات هڪ ڪري ڇڏيو.
زلزلن وقت هرنان گل ڪاتيا لا مار ۾ گيليرياس پلايا گرانڊي شاپنگ مال جي ڀرسان پارڪنگ ايريا جي بيسمينٽ ۾ موجود هڪ ننڍڙي ڪنڪريٽ جي چوڪيءَ ۾ ڊيوٽي تي موجود هو.
لڳي ٿو ته اها ڪنڪريٽ جي چوڪي سندس چوڌاري هڪ حفاظتي ڍانچي وانگر بڻجي وئي، جنهن کيس مٿس ۽ چوڌاري ڪريل 140 ٽن ملبي جي سڌي دٻاءَ کان بچائي ورتو.
ڪوسٽا ريڪا ريڊ ڪراس جي هڪ ٻئي امدادي ڪارڪن چيو، هرنان گل اسان کي ٻڌايو ته: “منهنجو ته هڪ نهن به نه چيڀاٽيو آهي.”
ملبي مان ڪڍڻ کان اڳ هرنان گل کي پاڻي فراهم ڪيو ويو، جڏهن ته ڊاڪٽرن سندس جسم ۾ رڳ ذريعي (IV ڊرپ پڻ لڳائي.
ان دوران وينزويلا، چلي، ڪوسٽا ريڪا، ايل سلواڊور، ميڪسيڪو، پرتگال ۽ آمريڪا جون گڏيل امدادي ٽيمون کيس محفوظ نموني ٻاهر ڪڍڻ لاءِ ڪم ڪنديون رهيون.
بچاءُ واري ٽيم پاران هرنان گل تائين پهچڻ لاءِ ٺاهيل سرنگهن ۽ رستن جا ڪجهه حصا ڪيترائي ڀيرا ڊهي پيا، جنهن سبب نه رڳو امدادي ڪارڪنن پر هرنان گل جي زندگي به مسلسل خطري ۾ رهي.
رات جو دير سان آخرڪار امدادي ٽيمن کي هرنان گل سان سڌو سنئون بصري رابطو قائم ڪرڻ ۾ ڪاميابي ملي.
ملبي اندر ڦاٿل هرنان گل تائين پهچايل هڪ ننڍڙي ڪئميرا سان رڪارڊ ڪيل وڊيو ۾ هڪ چلي جو فائر فائٽر کيس چوندي ٻڌو ويو:
“مهرباني ڪري پنهنجو منهن ڪئميرا ڏانهن ڦيرايو.”
