جروار(محمد بخش گبول) نقلي زرعي دوائن جي وڪري خلاف جروار يوٿ فورم ،آبادگارن ۽ سياسي سماجي ڪارڪنن پاران ذوالفقار گبول جي اڳواڻي ۾ ريلي ڪڍي احتجاج ڪيو ويو. جروار ،يارو لنڊ ،ڳڙھي چاڪر ۽ آس پاس جي ھزارين ايڪڙن تي بيٺل ڪپھ جو فصل نقلي زرعي دوائن جي استعمال سبب تباھ ٿيل آھي ان سلسلي ۾ جروار يوٿ فورم ۽ آبادگارن پاران ذولفقار گبول واجد علي عاجز ۽ سياسي سماجي ڪارڪنن جي اڳواڻي۾ پريس ڪلب تائين ريلي ڪڍي احتجاج ڪيو ويو . ان موقعي تي سياسي سماجي اڳواڻن علي گوھر گبول، رحيم گبول، واجد علي عاجز، منظر بوزدار جميل بوزدار، زاھد گبول فراز لنڊ ۽ ٻين ڳالھيندي چيو ته ھارين جو موجوده دؤر ۾ سڀ کان وڏو دشمن سرمائيدار آھي، سنڌ پنھنجي زرعي پيدوار سبب ھر دور ۾ خوشحال رھي آھي ۽ سنڌ جي زراعت جي خوشحالي ڏسي اڳ ۾ ڦورو ۽ لٽيرا ڪاھ ڪري ھارين کي تباھ ڪندا ھئا ھاڻي اھو ڪم سرمائيدار ڪري رھيا آھن سندن وڌيڪ چوڻ ھو ته سرمائيدارن جي ھن لٽ مار ۾ زراعت کاتو پڻ انھن جو ساٿاري بڻيل آھي جيڪو انھن کي چند پئسن عيوض بغير ٽيسٽ جي زرعي دوائون مارڪيٽ ۾ ھلائڻ جي اجازت ڏئي ٿو ڇڏي.
