ڪراچي: فوت ٿيل 25 ورهين جي مير رضا علي جي نمونن جي تجزيي واري رپورٽ مان معلوم ٿيو آهي ته سندس سيني ۽ پٺي جي زخمن مان ورتل نمونن، گڏوگڏ سندس ساڄي ۽ کاٻي هٿن جي چمڙي تي به گولي هلڻ جي باقيات يعني گن پائوڊر (GSR) موجود هيون. اها ڳالهه سومر ڏينهن سامهون آئي.
ڊان اخبار جي رپورٽ موجب نوجوان ڪاروباري شخص ۽ Wafflix نالي کاڌي پيتي جي دڪان جو مالڪ مير رضا 28 جولاءِ تي گم ٿي ويو هو ۽ هڪ ڏينهن کانپوءِ سندس گولين سان زخمي ٿيل لاش گلستانِ جوهر جي ٻوڙن مان مليو هو. سندس شروعاتي پوسٽ مارٽم، قبر ڪشائي ۽ ٻيهر پوسٽ مارٽم بابت پيدا ٿيل تڪرار کانپوءِ، سندس گمشدگي بابت داخل ڪيل ڪيس ۾ قتل جو قلم به شامل ڪيو ويو هو.
ٻئي پوسٽ مارٽم ۾ سندس جسم تي ڪيترائي زخم ۽ وات ۽ ڳلي اندر ڄميل ڪاري رنگ جو مادو موجود هجڻ جو انڪشاف ٿيو هو.
ان دوران قبر ڪشائي دوران گڏ ڪيل نمونا فارنزڪ تجزيي لاءِ موڪليا ويا. انهن نمونن جي جاچ ڪراچي يونيورسٽي جي انٽرنيشنل سينٽر فار ڪيميڪل اينڊ بايولوجيڪل سائنسز (ICCBS) ۾ ڪئي وئي، جنهن کانپوءِ ٻه رپورٽون جاري ڪيون ويون.
انهن مان هڪ رپورٽ، جيڪا 17 آگسٽ جي تاريخ واري آهي ۽ ڊان ڏٺي آهي، ان ۾ چيو ويو آهي ته رضا جي سيني ۽ پٺي جي زخمن مان ورتل سوئبن، ٻنهي هٿن جي چمڙي ۽ ٻنهي هٿن مان ورتل سوئبن ۾ گولي هلڻ جون باقيات (GSR) مليون.
رپورٽ موجب، سندس پيشاني جي چمڙي، منهن کي ڍڪيندڙ ڪپهه، ساڄي پير جي چمڙي، قبر مٿان موجود مٽي، لاش هيٺان موجود مٽي، نڪ ۽ ڳلي جي اندرين حصي مان ورتل سوئب، وات مان ورتل سوئب ۽ ساڄي هٿ جي چمڙي تي ڪنهن به قسم جو ”بيهوش ڪندڙ، نفسياتي اثر رکندڙ، منشيات يا زهريلو“ مادو نه مليو.
رپورٽ ۾ وڌيڪ چيو ويو آهي ته گڏ ڪيل شين ۾ به ڪو غير معمولي يا ٻاهريون ڪيميائي مرڪب نه مليو.
ٻي نموني جي تجزيي واري رپورٽ، جيڪا 11 آگسٽ جي تاريخ واري آهي ۽ ڊان ڏٺي آهي، ان ۾ چيو ويو آهي ته رضا جي قميص جي جاچ دوران پٺئين حصي ۾ هڪ سوراخ مليو، جنهن جي سامهون واري حصي ۾ ان سان لاڳاپيل پر وڌيڪ وڏو سوراخ موجود هو.
رپورٽ موجب، پٺئين حصي وارو سوراخ تقريباً 6.99 ملي ميٽر قطر جو هو، جڏهن ته اڳئين حصي وارو سوراخ تقريباً 35.37 ملي ميٽر قطر جو هو.
رپورٽن موجب، انهن سوراخن جي چوڌاري موجود ڪپڙي مان گڏ ڪيل مواد جي جاچ دوران قميص جي پٺئين ۽ اڳئين ٻنهي حصن تي ليڊ (Pb) ۽ بيريم (Ba) موجود هجڻ جي تصديق ٿي.
رپورٽ ۾ چيو ويو آهي ته: ”اهي عنصر عام طور تي روايتي هٿيار مان گولي هلڻ جي نتيجي ۾ پيدا ٿيندڙ باقيات سان لاڳاپيل هوندا آهن.“
رپورٽ ۾ ٻڌايو ويو ته پٺئين حصي واري سوراخ ۾ معلوم ٿيل ليڊ ۽ بيريم جي نسبتاً مقدار اڳئين سوراخ جي ڀيٽ ۾ وڌيڪ هئي.
رپورٽ ۾ وڌيڪ چيو ته SEM-EDS جي جاچ مان معلوم ٿيو ته انهن سوراخن سان لاڳاپيل مواد ۾ ليڊ ۽ بيريم تي مشتمل ذرڙا يا مادو موجود هو.
رپورٽ موجب، رضا جي رت ۾ بيوپيويڪين (Bupivacaine) جا به ڪجهه نشان مليا، جيڪو امائيڊ قسم جو مقامي بيهوشي ڏيندڙ دوا (Local Anaesthetic) آهي. سندس قميص تي تيزاب جا به ڪجهه نشان مليا.
جڏهن ته سندس معدي جي مواد، ڦڦڙن، جگر، گردن ۽ تِلي جي ورتل نمونن ۾ ”بيهوش ڪندڙ، نفسياتي اثر رکندڙ، منشيات يا زهريلي“ مادي جا ڪا به قابلِ سڃاڻپ باقيات نه مليون.
