ڪيف (ويب ڊيسڪ)روس يوڪرين جي گادي واري هنڌ ڪيف تي مسلسل ٻئي ڏينهن به ميزائل ۽ ڊرون استعمال ڪندي هوائي حملو ڪيو آهي.برطانوي نيوز ايجنسي موجب، آچر جي صبح جي حملن ۾ 12 ماڻهو مارجي ويا ۽ گهٽ ۾ گهٽ 18 زخمي ٿيا، جن ۾ ٽي ٻار به شامل آهن. روسي حملي رهائشي عمارتن کي به سخت نقصان پهچايو.ميڊيا رپورٽن موجب، ڪيترن ئي ڪلاڪن تائين هوائي سائرن وڄندا رهيا، شهرين کي رات جو پناهه گاهه ۾ رهڻ جي هدايت ڪئي وئي.ٻئي طرف، يوڪريني هوائي فوج چيو ته حملا، جن ۾ ڊرون، بيلسٽڪ ۽ ڪروز ميزائل شامل هئا، ڪيترن ئي شهرن کي نشانو بڻائڻ لاءِ ڪيا ويا، جڏهن ته مکيه ڌيان گادي واري هنڌ ڪيف تي هو.تازا حملا هڪ اهڙي وقت ۾ ڪيا ويا آهن جڏهن بين الاقوامي برادري روسي صدر ولاديمير پيوٽن تي جنگ بندي لاءِ دٻاءُ وجهي رهي آهي. ان کان علاوه، قيدين جي تبادلي جي ٻئي مرحلي ۾ ڇنڇر تي 600 کان وڌيڪ روسي ۽ يوڪريني فوجين کي آزاد ڪيو ويو.جمعي ڏينهن پهرين مرحلي ۾ تقريبن 800 قيدي آزاد ڪيا ويا.
