ڪراچي(اسٽاف رپورٽر) عارف حبيب گروپ ڪنسورشيم اعلان ڪيو آهي ته هو پاڪستان انٽرنيشنل ايئر لائنز (پي آءِ اي) ۾ حڪومت جي باقي 25 سيڪڙو حصيدارن کي به خريد ڪندو، جنهن کان پوءِ ان جو قومي ڪيريئر تي مڪمل ڪنٽرول هوندو.عارف حبيب لميٽيڊ جي چيف ايگزيڪيوٽو آفيسر شاهد علي حبيب چيو آهي ته پي آءِ اي جا 100 سيڪڙو حصا خريد ڪرڻ کان پوءِ، اهو مڪمل طور تي خانگي حيثيت ۾ ڪم ڪرڻ جي قابل هوندو.هن برٽش براڊڪاسٽنگ ڪارپوريشن کي ٻڌايو ته “ڪنسورشيم پنهنجو ذهن ٺاهي ورتو آهي ته اهو باقي 25 سيڪڙو حصا پڻ خريد ڪندو. هن جي مطابق، اهو فيصلو اپريل ۾ ڪيو ويندو ۽ پوءِ ايندڙ 12 مهينن ۾ ان جي ادائيگي ڪئي ويندي. هن چيو ته پي آءِ اي جا 100 سيڪڙو حصا خريد ڪرڻ کان پوءِ، اهو مڪمل طور تي خانگي حيثيت ۾ ڪم ڪرڻ جي قابل هوندو، مطلب ته ايئر لائن مڪمل طور تي خانگي شعبي جي ڪنٽرول ۾ هوندي ۽ ايئر لائن حڪومت جي مقرر ڪيل ميمبرن کان آزاد هوندي.
