ڪراچي(ويب ڊيسڪ)ڪنهن کي خبر هئي ته ولاديمير زيلنسڪي، اداڪار مان ملڪ جي صدارت تائين پهچندو. هن 2015 جي ٽي وي سيريز سرونٽ آف دي پيپل ۾ مرڪزي ڪردار ادا ڪيو، چئن سالن بعد 2019 ۾ يوڪرين جو حقيقي صدر بڻجي ويو. بي بي سي موجب ولاديمير زيلنسڪي سرونٽ آف دي پيپل ۾ هڪ استاد، ويسلي گولوبورو جو ڪردار ادا ڪيو هو، جنهن جي هڪ وڊيو وائرل ٿي آهي، جنهن ۾ هن هڪ استاد جي حيثيت سان ملڪ ۾ ڪرپشن خلاف جذباتي تقرير ڪئي هئي، جنهن کي ماڻهن بيحد پسند ڪيو ۽ کيس ملڪ جي صدارت تي پهچايو. رپورٽ موجب يوڪرين جي صدر پنهنجي پارٽي جو نالو ان ئي ٽي وي پروگرام سرونٽ آف دي پيپل رکيو ۽ ”ڪرپشن ختم ڪرڻ ۽ ملڪ جي اڀرندي حصي ۾ امن بحال ڪرڻ “ جي نعري هيٺ مهم هلائي. ولاديمير زيلنسڪي يوڪرين جي شهر ڪريويرخ ۾ پيدا ٿيو، يهودي والدين جي گهر ۾، هن گادي واري شهر ڪيف ۾ نيشنل اڪنامڪ يونيورسٽي مان قانون جي ڊگري حاصل ڪئي، پر اداڪاري ۾ دلچسپي ورتي ۽ ان فيلڊ کي چونڊيو. زيلنسڪي 2003 ۾ هڪ پروڊڪشن ڪمپني ٺاهي ۽ مزاحيه ٽيم جو نالو رکيو ”ڪروٽل 95“. 2010 تائين ولاديمير زيلنسڪي جو ڌيان پنهنجي ٽي وي ڪيريئر تي هو. 2019 جي صدارتي اليڪشن ۾ ولاديمير زيلنسڪي ان وقت جي صدر پيٽرو پوروشينڪو کي واضح فرق سان شڪست ڏئي ملڪ جو حقيقي صدر بڻجي ويو. هن 73 سيڪڙو ووٽ حاصل ڪيا ۽ 20 مئي 2019 تي ملڪ جي ڇهين صدر جي حيثيت سان حلف کنيو، ۽ ساڍا چار ڪروڙ عوام جو اڳواڻ بڻجي ويو.
