اسلام آباد(بيورو رپورٽ)وفاقي وزيرِ اطلاعات عطا الله تارڙ افغان طالبان خلاف جاري ڪارروائي “غضب للحق” جا تفصيل جاري ڪري ڇڏيا۔
هن ٻڌايو آهي ته افغان طالبان اتر بلوچستان ۾ قلعہ سيف الله، نوشڪي ۽ چمن ضلعن جي سورهن هنڌن تي زميني حملا ڪيا۔ بلوچستان ۾ افغان طالبان پنجويهه هنڌن تي پاڪ فوج خلاف فائرنگ ۽ چڙهائين جون ڪارروائيون ڪيون، پر سڀني هنڌن تي انهن حملن کي اثرائتي نموني ناڪام بڻايو ويو۔
هن ٻڌايو ته بلوچستان ۾ افغان طالبان جا ستاويهه ڪارندا مارجي ويا ۽ ڪيترائي زخمي ٿيا، جڏهن ته وطن جي دفاع دوران ايف سي بلوچستان جو هڪ جوان شهيد ۽ پنج جوان زخمي ٿيا۔
عطا تارڙ وڌيڪ چيو ته ڪي پي ڪي ۾ هڪ هنڌ تي زميني حملي جي ڪوشش ڪئي وئي ۽ صوبي ۾ ٻارهن هنڌن تي فائرنگ ڪئي وئي، جن کي بغير ڪنهن جاني نقصان جي ناڪام بڻايو ويو۔ جڏهن ته صوبي ۾ سڄي رات جاري ڪارروائين دوران افغان طالبان جا چاليهه ڪارندا مارجي ويا۔
وفاقي وزير جو چوڻ هو ته ڪارروائيون اڃا جاري آهن ۽ ڪارروائي بابت تفصيلي ڄاڻ ٿوري وقت ۾ جاري ڪئي ويندي۔
