لاهور(ويب ڊيسڪ)ريلوي واري وزير خواجا سعد رفيق چيو آهي ته بي اعتمادي جي رٿ پيش ڪري اسان خراب ڪيو آهي، اسٽيبلشمينٽ ان ۾ ڪو به ڪردار ادا نه ڪيو آهي.احتساب عدالت ٻاهران ميڊيا سان ڳالهائيندي سعد رفيق اڳوڻي وزيراعظم عمران خان کي تنقيد جو نشانو بڻائيندي چيو ته جيڪڏهن عمران خان خلاف بي اعتمادي جي رٿ پيش نه ٿي سگهي ها ته کيس اي وي ايم ذريعي ٻه ڀاڱي ٽي اڪثريت ملڻ گهرجي ها. من پسند مقرريون، عدليه ۾ ڪرپشن ٿيڻي هئي، ملڪ جي آئيني ۽ جمهوري بنيادن تي حملو ٿيڻو هو.هن چيو ته احتساب عدالتن ۾ ريٽائرڊ ججن جو ڪهڙو حال آهي، عمران خان جي سهولتڪارن 1973 جي آئين تي حملا ڪيا ۽ ملڪ ۾ ريموٽ ڪنٽرول صدارتي نظام آندو.خواجا سعد رفيق چيو ته هن سوچيو به نه هو ته آئيني تبديلي آڻڻ کانپوءِ به سازشون ٿينديون رهنديون، عمران خان ان سازشن ۾ اڪيلو ناهي، سندس سهولتڪار به ملوث هوندا، هو بار بار چوي ٿو ته سهولتڪار بند ڪن، کين ٿڌو ٿيڻ گهرجي چون ٿا ته هن ماڻهو تي باقاعده سيڙپڪاري ڪئي وئي آهي، 2018ع جي اليڪشن چوري ڪئي وئي، هن اها ڳالهه نه مڃي، هو هڪ نمبر جو ماڻهو آهي، ٻئي نمبر جو مهاتما ۽ فراڊ آهي.سعد رفيق چيو ته هنن پنهنجي سالميت وڪڻي ملڪي معيشت تباهه ڪئي، عمران خان آءِ ايم ايف سان شرمناڪ معاهدا ڪيا، 2011ع کان پروپيگنڊا هلي رهيو آهي، ذهنن کي آلوده ڪيو پيو وڃي.هن وڌيڪ چيو ته نواز شريف ۽ شهباز شريف خلاف ڪو به ثبوت ناهي مليو.سعد رفيق جو اهو به چوڻ آهي ته آئين ۽ جمهوريت جي بالادستي لاءِ اسان سڀ متحد آهيون، معزز عدالتون آئين جي تشريح ڪري سگهن ٿيون، اڄوڪو ڏينهن اهم آهي، اميد آهي ته سپريم ڪورٽ نوٽيس وٺندي.
