اسلام آباد (بيورو رپورٽ)بين الاقوامي مالياتي فنڊ (آءِ ايم ايف) مشن ۽ پاڪستاني اختيارين اسٽاف ليول معاهدي ۾ اهم اڳڀرائي ٿي آهي، آءِ ايم ايف پاران ان جي تصديق ڪئي وئي، جنهن مطابق آءِ ايم ايف ٽيم 24 سيپٽمبر کان 8 آڪٽوبر تائين ڪراچي ۽ اسلام آباد جو دورو ڪيو، جنهن ۾ ايڪسٽينڊڊ فنڊ سهولت جي ٻئي جائزي ۽ رزليئنس تي پهرين جائزي لاءِ شرڪت ڪئي، آءِ ايم ايف موجب جائزي ۾ اسٽاف ليول معاهدي ۾ اهم اڳڀرائي ٿي آهي، بيان موجب، ڪيترن ئي اهم معاملن تي ڳالهين ۾ اڳڀرائي ٿي، جن ۾ مالي نظم و ضبط برقرار رکندي ٻوڏ متاثرين جي بحالي جي حمايت، اسٽيٽ بينڪ جي هدف اندر افراط زر کي برقرار رکڻ لاءِ محتاط مالي پاليسي شامل آهي.ان کان علاوه، توانائي شعبي ۾ سڌارا ۽ سرڪاري ادارن جي دائري کي گهٽائڻ، گڏوگڏ شفافيت ۽ گورننس کي مضبوط ڪرڻ، پڻ ڳالهين جو حصو هئا.آءِ ايم ايف چيو ته باقي مسئلن کي حل ڪرڻ لاءِ پاڪستاني اختيارين سان پاليسي سطح تي ڳالهيون جاري رهنديون.
