ڪراچي(اسٽاف رپورٽر)سنڌ جي وڏي وزير سيد مراد علي شاهه دادو ۾ غربت سبب نوجوان ڇوڪرين جي شادين جو نوٽيس ورتو.مراد علي شاهه خان محمد ملاح ڳوٺ ۾ پئسن لاءِ 45 ڇوڪرين جي شادي بابت رپورٽ طلب ڪندي چيو آهي ته ڪمشنر حيدرآباد ان معاملي جا سماجي، معاشي ۽ قانوني سبب بيان ڪري.سنڌ جي وڏي وزير چيو آهي ته واقعي جي تفصيلي جاچ لاءِ ڪميٽي جوڙي وڃي ۽ اهو به ٻڌايو وڃي ته شادي شده ڇوڪريون ٻوڏ متاثر خاندانن جون هيون.هن چيو ته جيڪڏهن اهي ڇوڪريون ٻوڏ متاثر خاندانن جون هيون ته انهن کي ڪيتري امداد ڏني وئي؟ هن وقت شادي شده ڇوڪرين جي ڪهڙي حالت آهي؟ هر پهلو جي رپورٽ ڪريو. مراد علي شاهه ڪمشنر حيدرآباد کي انڪوائري رپورٽ ۾ پنهنجون سفارشون ڏيڻ جي به هدايت ڪئي ۽ چيو ته هر رخ کان رپورٽ پيش ڪئي وڃي ته جيئن ان کي درست ڪري سگهجي.
