ڪراچي (اسٽاف رپورٽر) تحريڪ انصاف سنڌ اسيمبلي ۾ سرڪاري اسپتال اندر ناري عصمت کاڻيجو جي لڄالٽ ۽ قتل واقعي خلاف مذمتي ٺهراءُ پيش ڪندي صحت کاتي جي صوبائي وزير کان استعيفيٰ جو مطالبو ڪيو آهي. تحريڪ انصاف جي ايم پي اي راجا اظهر ساٿي ميمبرن جي صحيح سان سنڌ اسيمبلي ۾ ٺهراءُ پيش ڪيو. ٺهراءُ ۾ صحت کاتي جي صوبائي وزير عذرا فضل پيچوهو کان استعيفيٰ جو مطالبو ڪندي چيو ويو آهي ته هي ايوان نوجوان ناري سان پيش آيل واقعي جي سخت لفظن ۾ مذمت ڪري ٿو، جيڪا سرڪاري اسپتال ۾ علاج لاءِ پهتي پر کيس لڄالٽ جو نشانو بڻائڻ بعد قتل ڪيو ويو. ابراهيم حيدري سان تعلق رکندڙ ناري جيڪا بولڊ ۽ ڪميونٽي ليڊر طور سڃاڻپ رکندي هئي، اها هوڙ جي سور جي دوا لاءِ ڪورنگي نمبر 5 جي سرڪاري اسپتال ۾ 18 اپريل تي دوا وٺڻ وئي ته وحشي صفت ڊاڪٽرن، اياز، شڪيل ٽن عملي جي ساٿين جي مدد سان کيس بيهوش ڪرڻ جي دوا ڏني، جنهن بعد سندس لڄ لٽي. بعد ۾ ٿورو هوش اچڻ تي جڏهن ناري کين ڌمڪيون ڏنيون ته جانور صفت ڊاڪٽرن کيس ٻيهر بيهوش ڪري زهر ڏئي ڇڏي. هن ڪيس جو مک جوابدار ڊاڪٽر اياز ضمانت ڪرائي ورتي آهي ۽ سندس 3 ساٿي عامر، شاهزيب ۽ ولي محمد گرفتار آهن ۽ ڪراچي اوڀر جي جڊيشل مئجسٽريٽ کين جيل اماڻي ڇڏيو آهي. سنڌ جي وڏي وزير واقعي جو نوٽيس وٺندي پوليس تي تنقيد ڪندي رپورٽ طلب ڪئي آهي. اڄ سنڌ
اسمبلي ۾ پيش ٿيل ٺهراءُ توڙي سنڌ جي وڏي وزير پاران پوليس تي ڇوهه ڇنڊڻ مان بظاهر لڳي پيو ته حڪومت توڙي اپوزيشن هن حيواني ۽ انسانيت کي لڄائيندڙ واقعي تي سياست پيا ڪن. پوليس هٿ سان رشوت وٺي ڪيس خراب ڪيو آهي.
