اسلام آباد: (بيورو رپورٽ) اطلاعات واري وزير عطا تارڙ چيو آهي ته هڪ سياسي اڳواڻ ملڪ ۾ بدامني پکيڙي فيض حميد انهي سازش ۾ سهولتڪاري جو ڪردار ادا ڪيو. اسلام آباد ۾ پريس ڪانفرنس ڪندي هن چيوته نوازشريف جي اڳواڻي ۾ مسلم ليگ(ن) هميشه عوام جي خدمت ڪئي، هن ملڪ ۾ ترقياتي منصوبن جي شروعات ڪئي، پهريان موٽروي تعمير ڪرايو ملڪ ۾ موٽر وي جو ڄار وڇايو. سرمائيڪارن کي سهولتون ڏنيون ۽ هاڻ انهن جي اڳواڻي ۾ پنجاب حڪومت بجلي صارفين کي سهولتون فراهم ڪيون جيڪو بهترين قدم آهي. اطلاعات واري وزير چيو ته پنجاب جي وزيراعليٰ مريم نواز پنجاب ۾ صارفين کي بجلي جي مد ۾ وڏو رليف ڏنو، حڪومت پيٽروليم شين جي قيمتن ۾ گهٽتائي ڪئي آهي، وفاقي حڪومت بجلي صارفين لاءِ 50 ارب روپيه مقرر ڪيا آهن. پنجاب حڪومت عوام کي رليف ڏيڻ جي ايجنڊا تي ڪم ڪري رهي آهي. فوج ۾ گرفتارين جي معاملي تي هن چيو ته پاڪ فوج ۾ خود احتسابي جو پنهنجو ميڪنزم آهي، هڪ سياسي اڳواڻ ملڪ ۾ انتشار ۽ ورهاست جي سياست کي مٿي ڪيو، هن ملڪ ۾ بدامني پکيڙي ۽ ملڪي سالميت جي خلاف سازشون ڪيون، جنرل(ر) فيض حميد انهن جي سازش ۾ شامل هو. اطلاعات واري وزير چيو ته دهشتگردن کي واپس ڪنهن آندو هو؟ پي ٽي آءِ جي باني چيئرمين چيو ته طالبان کي واپس آڻڻ گهرجي، فوج پنهنجي معاملن جي شفاف جاچ ڪري رهي آهي اهي سمورا ماڻهو پي ٽي آءِ باني سان گڏ انتشار پکيڙڻ جي ڪوشش ۾ شامل هئا. پي ٽي آءِ باني چيئرمين ڳٺ جوڙ جي سياست ڪئي، ملڪ جي امن کي نقصان پهچائيندڙن جو اهوئي انجام ٿيندو آهي. هن وڌيڪ چيو ته رائٽ سائزنگ ۽ ڊائون سائزنگ لاءِ وزيراعظم محمد شهباز شريف تجويزون طلب ڪيون آهن.
