اسلام آباد (بيورو رپورٽ) آزاد ڪشمير جي سياسي ۽ انتظامي صورتحال تي مسلم ليگ ن جي صدر نواز شريف جي صدارت ۾ اجلاس ٿيو، اجلاس ۾ مسلم ليگ ن آزاد ڪشمير ۽ مسلم ليگ ن جي اعليٰ قيادت شرڪت ڪئي.آزاد ڪشمير جي سياسي صورتحال تي ڳڻتي جو اظهار ڪندي نواز شريف چيو ته مسلم ليگ (ن) جو ڪشمير جي مسئلي تي واضح موقف آهي، ته والاريل ڪشمير جي عوام کي گڏيل قومن جي قراردادن موجب خود اراديت جو حق ڏنو وڃي، ۽ مسلم ليگ (ن) آئيني، بنيادي حقن ۽ ترقي جي لحاظ کان آزاد ڪشمير جي عوام کي ترجيح ڏني آهي.ملاقات دوران نواز شريف چيو ته اهڙي صورتحال پيدا نه ٿيڻ گهرجي ها، هي ملڪ اسان سڀني جو آهي، اسان کي آئين جي دائري ۾ رهي عوام جي حقن لاءِ جدوجهد ڪرڻ گهرجي، ۽ مسلم ليگ (ن) سڀني جمهوري قوتن سان گڏ پنهنجو ڀرپور ڪردار ادا ڪندي. نواز شريف پيغام ڏنو ته ڪشمير جي عوام کي پاڪستان سان پنهنجا نظرياتي ۽ فڪري لاڳاپا برقرار رکندي پرامن رهڻ گهرجي، ڌرڻا ختم ڪرڻ گهرجن ۽ بامعني ڳالهيون ڪرڻ گهرجن. هن اميد ظاهر ڪئي ته آزاد ڪشمير جا ماڻهو، حڪومت ۽ پاڪستاني حڪومت، سڀني سياسي پارٽين سان گڏ، امن بحال ڪرڻ ۾ ڪردار ادا ڪندا. مسلم ليگ (ن) جي صدر چيو ته اسان کي ڀائيچاري ۽ رواداري جي سياست کي فروغ ڏيڻ گهرجي. هن ملڪ ۾ اسان سڀني کي ڀائرن وانگر رهڻو آهي. ڪشميرين پاڪستان لاءِ لازوال قربانيون ڏنيون آهن. پاڪستان هميشه ڪشميرين جي جدوجهد کي پنهنجي جدوجهد سمجهيو آهي ۽ ان ۾ ڪردار ادا ڪيو آهي.نواز شريف چيو ته موجوده حالتن ۾، پاڪستان جي حڪومت ۽ پاڪستان جي دفاعي ادارن بي مثال ڪاميابيون حاصل ڪيون آهن، ۽ ڪنهن به اهڙي عمل جو حصو نه بڻجڻ گهرجي جيڪو دشمن قوتن جي ناپاڪ مقصدن کي مضبوط ڪري.اجلاس ۾ آزاد ڪشمير ۾ تازن واقعن ۾ قيمتي جانين جي نقصان تي ڏک جو اظهار ڪيو ويو ۽ مغفرت جي دعا ڪئي وئي.نواز شريف گلگت بلتستان ۽ آزاد ڪشمير ۾ چونڊ مهم سٺي طريقي سان هلائڻ تي انجنيئر امير مقام جي خدمتن جي به تعريف ڪئي.
