ڪراچي (اسٽاف رپورٽر)سنڌ هاءِ ڪورٽ تعليم کاتي ۾ ڪانٽريڪٽ تي ڀرتي ٿيل هيڊ ماسترن کي انهن جي موجوده عهدن تي برقرار رکڻ جو حڪم ڏنو آهي.تعليم کاتي ۾ ڪانٽريڪٽ تي ڀرتي ٿيل هيڊ ماسترن کي مستقل ڪرڻ جو ڪيس سنڌ هاءِ ڪورٽ ۾ ٻڌڻي هيٺ هو.عدالت درخواست ڏيندڙن جا ڪيس 3 مهينن اندر سنڌ پبلڪ سروس ڪميشن (ايس پي ايس سي) ڏانهن موڪلڻ جو حڪم ڏنو ۽ چيو ته ايس پي ايس سي درخواست ڏيندڙن جي قابليت ۽ قانونن مطابق جائزو وٺي.ٻڌڻي دوران، درخواست ڏيندڙ جي وڪيل چيو ته ايس پي ايس سي درخواست ڏيندڙن جا ڪيس وٺڻ کان انڪار ڪري ڇڏيو آهي.سرڪاري وڪيل عدالت کي ٻڌايو ته 937 مان 866 اميدوارن جون سروس فائلون ايس پي ايس سي ڏانهن موڪليون ويون آهن، درخواست ڏيندڙن رضاڪارانه طور تي پنهنجون پوسٽون يا نوڪريون ڇڏي ڏنيون آهن.سنڌ هاءِ ڪورٽ چيو ته سروس قانونن ۾ ڪانٽريڪٽ ملازمت جي ڪا قانوني حيثيت ناهي، اعليٰ عدالتن به ڪانٽريڪٽ تي ملازمن جي ڀرتي تي تنقيد ڪئي آهي، گريڊ 1 کان 15 تائين ملازمن جي ڀرتي لاءِ شفاف مقابلي وارو نظام هجڻ گهرجي.عدالت ريمارڪس ڏنا ته حيرت جي ڳالهه آهي ته صوبي ۾ گريڊ 17 جي هيڊ ماسترن جي ڀرتي ڪانٽريڪٽ تي آهي. هيڊ ماسترن جي عهدي تي ڀرتي مقابلي واري امتحان يا ترقي جي بنياد تي ٿيڻ گهرجي ها. ايس پي ايس سي جي موجودگي ۾ ڪانٽريڪٽ تي ڀرتي سمجھ کان ٻاهر آهي.
