احمد آباد(ويب ڊيسڪ)ڏکڻ آفريڪا ڊبل سپر اوور جي سنسني خيز مقابلي بعد افغانستان کي شڪست ڏئي ڪاميابي حاصل ڪئي، جڏهن ته افغانستان ٽي 20 ورلڊ ڪپ جي اربع واري ميچ ٽائي ٿيڻ کان پوءِ تاريخي فتح کان نهايت ٿوري فرق سان محروم رهجي ويو۔
احمدآباد ۾ ڏکڻ آفريڪا پهريان بيٽنگ ڪندي 6 وڪيٽن جي نقصان تي 187 رنسون ٺاهيون، جنهن جي جواب ۾ افغانستان به 187 رنسون ٺاهي آل آئوٽ ٿي ويو۔
پهريون سپر اوور به انتهائي دلچسپ رهيو، جنهن ۾ ٻنهي ٽيمن 17، 17 رنسون ٺاهيون ۽ اسڪور ٻيهر برابر رهيو۔ ان کان پوءِ ٻئي سپر اوور جي آخري بال تي ڏکڻ آفريڪا فتح حاصل ڪئي۔
ڏکڻ آفريڪا پنهنجي ٻئي سپر اوور ۾ 23 رنسون ٺاهيون، جڏهن ته افغانستان پنهنجي سپر اوور جي ٻي بال تي هڪ وڪيٽ وڃائي ويٺو۔ رحمان الله گرباز کي ناممڪن جهڙي فتح لاءِ چار بالن تي چار ڇڪا گهرجن ها۔
گرباز حيران ڪندڙ انداز ۾ ڪيشو مهاراج کي ٽي ڀيرا وڏي شاٽ سان بال اسٽيڊيم کان ٻاهر اڇلايو. پنجين بال تي هڪ وائيڊ ٿيڻ سبب افغانستان کي هاڻي کٽڻ لاءِ 6 رنسون گهرجن پيون، جڏهن ته چوڪو لڳائڻ سان مقابلو ٽئين سپر اوور ۾ وڃي سگهي پيو۔
گهڻي دٻاءُ ۽ تڪليف ڀرين لمحن ۾ کاٻي هٿ جي اسپنر مهاراج حوصلو برقرار رکندي وائيڊ يارڪر ڪرائي، جنهن تي گرباز بائونڊري هڻڻ جي ڪوشش ڪئي پر پوائنٽ تي موجود ڊيَوڊ ملر هٿان ڪيچ ٿي ويو۔
هي ڏکڻ آفريڪا جي گروپ ڊي ۾ لڳاتار ٻي ڪاميابي هئي، جنهن سان هو نيوزيلينڊ کان پوءِ ٻئي نمبر تي اچي ويو۔
ان کان ٿوري دير اڳ، گرباز 42 بالن تي شاندار 84 رنسون ٺاهيون ۽ افغانستان کي آخري اوور ۾ کٽڻ لاءِ 13 رنسون گهرجن پيون، جڏهن ته هڪ وڪيٽ باقي هئي۔
ڪاگيسو رباڊا ٻن نو بالن ۽ هڪ وائيڊ ڪرائي، جڏهن ته نور احمد هڪ ڇڪو هنيو، جنهن کان پوءِ افغانستان کي ٽن بالن تي کٽڻ لاءِ 2 رنسون گهرجن پيون۔ پر نور احمد ٻئي فيصلا ڪن رن لاءِ ڊوڙندي رن آئوٽ ٿي ويو ۽ اسڪور برابر رهيو۔
ميچ جي پهرين اننگز ۾، افغانستان جي دعوت تي پهريان بيٽنگ ڪندي ڪوئنٽن ڊي ڪوڪ ۽ ريان رِڪيلٽن جارحاڻيون اڌ سينچريون اسڪور ڪيون۔
ڏکڻ آفريڪا شروعاتي وڪيٽ وڃائي ويٺو، پر ڊي ڪوڪ (59) ۽ رِڪيلٽن (61) 114 رنسن جي ڀائيواري قائم ڪري مخالف ٽيم تي دٻاءُ وڌو۔
ٻنهي بيٽسمينن جي آئوٽ ٿيڻ کان پوءِ، اسٽار اسپنر راشد خان ڏکڻ آفريڪا کي وڌيڪ 200 کان مٿي مجموعي تائين پهچڻ کان روڪي ڇڏيو۔
ڊي ڪوڪ 34 بالن تي مجيب الرحمان خلاف چوڪو هڻي پنهنجي اڌ سينچري مڪمل ڪئي، جڏهن ته ٻن بالن بعد کاٻي هٿ جي بيٽسمين رِڪيلٽن ڇڪو هڻي پنهنجي ففٽي پوري ڪئي۔
ٻنهي بيٽسمين چوڪن ۽ ڇڪن جي برسات ڪري افغانستان کي مجبور ڪيو ته هو دنيا جي وڏي ڪرڪيٽ اسٽيڊيم ۾ پنهنجا بالر بار بار تبديل ڪن، جيڪو گهڻو ڪري خالي هو۔
ليگ اسپنر راشد خان ٽن بالن جي اندر ٻنهي اهم بيٽسمينن کي آئوٽ ڪري ميچ جو رخ موڙي ڇڏيو؛ ڊي ڪوڪ ڊيپ مڊ وڪيٽ تي ڪيچ ٿيو ۽ رِڪيلٽن ايل بي ڊبليو ٿيو۔
انهن وڪيٽن کان پوءِ ڏکڻ آفريڪا جي رن ٺاهڻ جي رفتار گهٽجي وئي، جڏهن ته ڊيوالڊ بريوس 19 بالن تي 23 رنسون ٺاهڻ بعد تيزي آڻڻ جي ڪوشش ۾ آئوٽ ٿيو۔
ڊيَوڊ ملر ناٽ آئوٽ 20 رنسون ٺاهيون ۽ مارڪو يانسن ست بالن تي 16 رنسون ڪري پروٽيز کي مضبوط انداز ۾ اننگز ختم ڪرڻ ۾ مدد ڏني۔
