اسلام آباد(بيورو رپورٽ) وفاقي حڪومت سون جي درآمد ۽ برآمد تي پابندي هٽائي ڇڏي آهي.وفاقي ڪابينا جي منظوري کان پوءِ، واپار واري وزارت سون جي درآمد ۽ برآمد تي پابندي هٽائڻ جو نوٽيفڪيشن جاري ڪيو آهي.نوٽيفڪيشن موجب، سون جي عالمي واپار سان لاڳاپيل معطل ٿيل ايس آر او بحال ڪيو ويو آهي.نوٽيفڪيشن ۾ چيو ويو آهي ته وفاقي حڪومت قيمتي ڌاتو ۽ زيورن جي درآمد ۽ برآمد سان لاڳاپيل ڪجهه ترميمون پڻ ڪيون آهن، جڏهن ته قيمتي ڌاتو ۽ زيورن جي درآمد ۽ برآمد لاءِ فريم ورڪ برقرار رهندو، فريم ورڪ شفافيت ۽ آٽوميشن ۾ بهتري سان جاري رهندو.سون جي برآمد ۽ درآمد تي پابندي هن سال مئي ۾ لاڳو ڪئي وئي هئي، ۽ واپار واري وزارت 6 مئي 2025 تي سون جي واپار کي منظم ڪندڙ ايس آر او کي 60 ڏينهن لاءِ معطل ڪري ڇڏيو.ذريعن جو چوڻ آهي ته سون جي اسمگلنگ جي شڪايت تي برآمد ۽ درآمد تي پابندي لاڳو ڪئي وئي هئي.
