راولپنڊي(ويب ڊيسڪ) راولپنڊي پوليس ٻڌايو آهي ته اڱاري تي مال روڊ تي سيڪورٽي فورسز حملو ڪندڙ شخص کي جوابي فائرنگ ڪري ماري ڇڏيو. پوليس موجب مارجي ويل شخص، هڪ ”خاص سياسي پارٽي“ سان لاڳاپيل هو. پوليس موجب، هن سيڪيورٽي فورسز تي مبينا طور فائرنگ ڪئي، جنهن جي نتيجي ۾ هڪ اهلڪار زخمي ٿيو.
راولپنڊي پوليس پنهنجي بيان ۾ چيو ته ”حملو ڪندڙ محمد حسين کي جوابي فائرنگ ۾ فوري طور ماريو ويو.“
پوليس وڌيڪ ٻڌايو ته سندس موبائل فون ۽ ٻين سامان مان ثبوت ۽ ”لاڳاپن جا نشان“ سامهون آيا آهن، جڏهن ته وڌيڪ جاچ جاري آهي.
پوليس چيو ته ”قانون لاڳو ڪندڙ ادارا هر قسم جي دهشتگردي ۽ بدامني کي ڀڙڪائڻ خلاف ڪارروائي ختم ڪرڻ لاءِ مڪمل طور تي تيار ۽ پرعزم آهن.“
پي ٽي وي نيوز سيڪيورٽي ذريعن جي حوالي سان ٻڌايو ته مبينا حملو ڪندڙ خيبر ضلعي جو رهواسي ۽ ”پي ٽي آءِ جو سرگرم ڪارڪن“ هو. رپورٽ ۾ وڌيڪ چيو ويو ته سندس قبضي مان مبينا طور پي ٽي آءِ جو جهنڊو، گوليون ۽ هٿيار پڻ هٿ ڪيا ويا.
واقعي کانپوءِ نيوز چينلن تي نشر ڪيل پنهنجي بيان ۾ اطلاعات واري وزير عطاالله تارڙ، رياستي ميڊيا پاران واقعي جي رپورٽ نشر ٿيڻ کان پوءِ، پي ٽي آءِ جي ”تشدد واري سياست“ تي سخت تنقيد ڪئي.
پي ٽي وي تي مبينا حملو ڪندڙ وٽان هٿ اچڻ واري ڳاڙهي ۽ سائي ڪپڙي، بندوق ۽ گولين جا منظر پڻ نشر ڪيا ويا، جڏهن ته اهي منظر تارڙ جي وڊيو بيان دوران به ڏيکاريا ويا.
اطلاعات واري وزير چيو ته ”سيڪيورٽي اهلڪارن تي فائرنگ ڪرڻ جو ڪو به جواز نه هو“، ۽ بعد ۾ واقعي جي هنڌ جي تصديق راولپنڊي جي مال روڊ طور ڪئي.
تارڙ اسلام آباد ڏانهن لانگ مارچ جي سڏ جو حوالو ڏنو، جيڪو پي ٽي آءِ 27 سيپٽمبر لاءِ اعلان ڪيو آهي. هن دعويٰ ڪئي ته ”اهو رڪارڊ تي آهي ته اهي پنهنجي هر احتجاج ۾ هٿياربند ٿي اچن ٿا، سيڪيورٽي اهلڪارن تي فائرنگ ڪن ٿا ۽ کين شهيد ڪن ٿا.“
تارڙ چيو ته ”اهي پرامن احتجاج تي يقين نٿا رکن ۽ اڄ سڄي قوم انهن جا ناپاڪ مقصد ۽ ارادا ڏسي ورتا آهن.“ هن چيو ته سيڪيورٽي اهلڪارن کي ”سرعام ۽ ڏينهن ڏٺي جو نشانو بڻايو ويو.“
هن الزام لڳايو ته ”اهو ئي انهن جي نظريو آهي؛ اهي تشدد ۽ اهڙن واقعن تي يقين رکن ٿا. پي ٽي آءِ هميشه تشدد جي سياست ڪئي آهي ۽ انهن جو هڪ به احتجاج پرامن نه رهيو آهي.“
تارڙ چيو ته اڄ جي واقعي ۾ مبينا حملو ڪندڙ وٽان پي ٽي آءِ جو جهنڊو ۽ ”ٻيا دستاويز“ هٿ اچڻ کانپوءِ، سندس دعويٰ موجب، پي ٽي آءِ جو مقصد رڳو ”ملڪ ۾ انتشار پکيڙڻ ۽ امن امان جي صورتحال خراب ڪرڻ“ آهي.
وزير زور ڏيندي چيو ته پي ٽي آءِ پاران لانگ مارچ جو اعلان ان وقت ڪيو ويو، جڏهن پاڪستان سعودي عرب ۽ ترڪي سان گڏيل دفاعي معاهدو ڪرڻ کانپوءِ عالمي سطح تي ساراهه حاصل ڪري رهيو هو.
تارڙ چيو ته ”جڏهن به پاڪستان ترقي ڪري ٿو ۽ عزت حاصل ڪري ٿو ته اها ڳالهه پي ٽي آءِ کان برداشت نٿي ٿئي.“
پي ٽي آءِ جي ترديد
پي ٽي آءِ هن واقعي کان لاتعلقي ظاهر ڪندي چيو ته ان جو دهشتگردي سان ڪو به تعلق ناهي ۽ پارٽي کي هن واقعي سان ڳنڍڻ جون ڪوششون ڪيون پيون وڃن.
تارڙ جي بيان تي ردعمل ڏيندي پي ٽي آءِ جي اسلام آباد ريجنل صدر عامر مغل چيو ته پارٽي پرامن ۽ غير هٿياربند سياسي جدوجهد تي يقين رکي ٿي ۽ ان کي ڪنهن به قسم جي تشدد واري ڪارروائي سان ڳنڍڻ جي هر ڪوشش کي رد ڪري ٿي.
مغل مطالبو ڪيو ته واقعي جون حقيقتون عوام آڏو آنديون وڃن ۽ اختيارين تي زور ڀريو ته هن واقعي کي پي ٽي آءِ کي بدنام ڪرڻ لاءِ استعمال نه ڪيو وڃي.
هن وڌيڪ چيو ته پي ٽي آءِ کي دهشتگرد يا رياست مخالف تنظيم طور پيش ڪرڻ وارو بيانيو پاڪستان جي عوام اڳ ئي رد ڪري ڇڏيو آهي. سندس دعويٰ موجب، عوام 8 فيبروري 2024ع تي وڏي انگ ۾ ووٽ ڏئي پارٽي جي حمايت ڪئي هئي.
