پير جو ڳوٺ(ن س) پير جو ڳوٺ ڀرسان ناريجا برادري جي ٻن ڌرين ۾ سڱاوتي تڪرار تان ٿيل جهيڙي ۽ فائرنگ جي نتيجي ۾ سس ۽ ننهن سميت 5 ڄڻا قتل ۽ هڪ نينگري سميت 2 ڄڻا زخمي ٿي پيا آهن.ميڊيا رپورٽن موجب، ڳوٺ اسحاق ناريجو ۾ ناريجا برادري جي ٻن ڌرين ۾ جهيڙو ٿيو، جنهن دوران فائرنگ جي ڏي وٺ ۾ هڪ ڌر جا فتح محمد ۽ سندس پٽ راجا ناريجو مارجي ويا. ان کانسواءِ ٻي ڌر جا سهراب ناريجو، جيجان ۽ سندس ننهن رابعه ناريجو به مارجي ويون. فائرنگ واقعي ۾ نينگري علي رضا ناريجو سميت ٻه ڄڻا زخمي ٿي پيا آهن. پنجن ڄڻن جي قتل بعد علائقي ۾ ڏهڪاءُ واري صورتحال آهي. پوليس جي نفري واقعي واري هنڌ پهچي وئي آهي، جڏهن ته صورتحال تي ضابطو آڻڻ لاءِ مختلف ٿاڻن تان واڌو نفري پڻ طلب ڪئي وئي آهي.
