تهران(ويب ڊيسڪ)ايراني صدر مسعود پزشڪيان ڇنڇر ڏينهن چيو آهي ته آمريڪا سان جوهري ڳالهين دوران ايران عالمي طاقتن جي دٻاءَ آڏو نه جهڪندو۔
رياستي ٽي وي تي سڌي نشر ڪيل تقرير ۾ هن چيو: “عالمي طاقتون اسان کي جهڪائڻ لاءِ قطار ۾ بيٺيون آهن… پر اهي جيڪي به مسئلا پيدا ڪن، اسان هرگز جهڪنداسين نه.”
هي بيان اُن کان پوءِ سامهون آيو جڏهن آمريڪي صدر ڊونلڊ ٽرمپ چيو ته هو ايران خلاف محدود فوجي ڪارروائي تي غور ڪري رهيو آهي، جڏهن ته هن وچ اوڀر ۾ وڏي بحري فوجي تياري جو حڪم پڻ ڏنو آهي ته جيئن تهران تي پنهنجي جوهري پروگرام کي محدود ڪرڻ لاءِ معاهدو ڪرڻ جو دٻاءُ وڌو وڃي۔
تازي خبرداري اُن کان پوءِ آئي جڏهن ايران جي پرڏيهي وزير چيو ته واشنگٽن سان ممڪنه معاهدي جو مسودو ايندڙ ڪجهه ڏينهن ۾ تيار ٿي ويندو، ڇو ته هن هفتي جي شروعات ۾ جنيوا ۾ ٻنهي ڌرين وچ ۾ ڳالهيون ٿيون هيون۔
خميس ڏينهن ٽرمپ چيو هو ته جيڪڏهن تهران 10 ڏينهن اندر معاهدو نه ڪيو ته “خراب نتيجا” نڪرندا، جنهن مهلت کي هن بعد ۾ وڌائي 15 ڏينهن ڪري ڇڏيو هو۔
جمعي ڏينهن هڪ صحافي جي سوال تي ته ڇا هو محدود فوجي حملي تي غور ڪري رهيو آهي، ٽرمپ وراڻيو: “وڌ ۾ وڌ اهو چئي سگهان ٿو ته مان ان تي غور ڪري رهيو آهيان.”
فوجي تيارين جي حصي طور آمريڪي جهاز بردار ٻيڙو يو ايس ايس جيرالڊ آر فورڊ جمعي ڏينهن آبنائي جبرالٽر مان گذرندي بحيره روم ۾ داخل ٿيندي ڏٺو ويو، جنهن کي ٽرمپ علائقي ڏانهن موڪلڻ جو حڪم ڏنو هو۔ واشنگٽن اڳ ئي جنوري ۾ يو ايس ايس ابراهيم لنڪن ۽ ساڻس گڏ حفاظتي جنگي ٻيڙا نار واري علائقي ڏانهن موڪليا هئا۔
جنيوا ۾ ڳالهين کان پوءِ تهران چيو ته ٻنهي ڌرين ممڪنه معاهدي جا مسودا پيش ڪرڻ تي اتفاق ڪيو آهي، جنهن کي ايران جي پرڏيهي وزير عباس عراقچي آمريڪي ميڊيا سان ڳالهائيندي “اڳڀرائي جو قدم” قرار ڏنو هو۔
هن چيو ته: “منهنجو خيال آهي ته ايندڙ ٻن ٽن ڏينهن ۾ اهو تيار ٿي ويندو، ۽ منهنجن بالا اختيارين جي حتمي منظوري کان پوءِ اهو اسٽيو وِٽڪوف حوالي ڪيو ويندو”، جيڪو ٽرمپ جو وچ اوڀر بابت اهم مذاڪراتي نمائندو آهي۔
عراقچي وڌيڪ چيو ته آمريڪي مذاڪرات ڪندڙن تهران کان جوهري افزودگي وارو پروگرام ختم ڪرڻ جو مطالبو نه ڪيو آهي، جيڪو ڪجهه آمريڪي اهلڪارن جي بيانن جي ابتڙ آهي۔
هن آمريڪي ٽي وي نيٽ ورڪ سان جاري ڪيل انٽرويو ۾ چيو: “اسان ڪنهن به قسم جي معطلي جي پيشڪش ناهي ڪئي، ۽ آمريڪي ڌر صفر افزودگي جو مطالبو ناهي ڪيو.”
هن وڌيڪ چيو: “هاڻي جنهن ڳالهه تي بحث هلي رهيو آهي، اها اها آهي ته ڪيئن يقيني بڻائجي ته ايران جو جوهري پروگرام، جنهن ۾ افزودگي به شامل آهي، پرامن هجي ۽ هميشه پرامن ئي رهي.”
