لاهور (ويب ڊيسڪ) لاهور هاءِ ڪورٽ سرڪاري ملازمن ۽ عوامي عهدن تي فائز ماڻهن کي سول ايوارڊ ڏيڻ کي چئلينج ڪندڙ درخواست رد ڪري ڇڏي.عدالت فيصلو ڏنو ته آئين عوامي خدمت کي بغير معاوضي يا رضاڪارانه خدمتن تائين محدود نٿو ڪري، تنهن ڪري سرڪاري ملازمن کي سول ايوارڊ کان نااهل نٿو ڪري سگهجي.عدالت موجب، صرف سرڪاري عهدو رکڻ ڪنهن به شخص کي سول ايوارڊ جو حقدار نٿو بڻائي، جڏهن ته، پاڪستان جي سول ايوارڊن ۾ عوامي خدمت هڪ الڳ ڪيٽيگري آهي ۽ اسٽيبلشمينٽ ڊويزن کي ان لاءِ نامزد ڪندڙ اداري طور مقرر ڪيو ويو آهي.فيصلي ۾ چيو ويو آهي ته جاچ ڪميٽيون، ايوارڊ سفارش ڪميٽيون ۽ مرڪزي ايوارڊ ڪميٽي مقرر ڪيل طريقيڪار تحت ڪم ڪن ٿيون. عوامي خدمت جو جائزو وٺڻ وقت، مقرر ڪيل سرڪاري ذميوارين کان ٻاهر پيش ڪيل خدمتن کي حساب ۾ رکيو ويندو آهي.عدالت فيصلو ڏنو ته انصاف، سالميت، غير جانبداري، ۽ ڪردار جي شهرت کي پڻ سول ايوارڊن جي معيار ۾ شامل ڪيو ويو آهي، جڏهن ته عام ملازمت جي ڪارڪردگي ۽ غير معمولي عوامي خدمت جي وچ ۾ واضح فرق ڪيو ويو آهي.فيصلي ۾ ان ڳالهه جي تصديق ڪئي وئي آهي ته ڪنهن فرد جي غير معمولي عوامي خدمت کي صرف ان بنياد تي سول ايوارڊ لاءِ غور ڪرڻ کان خارج نٿو ڪري سگهجي ته هو پگهار وصول ڪري ٿو.عدالت قرار ڏنو ته قانوني بنياد جي غير موجودگيءَ ۾، هو صدر يا لاڳاپيل اختيارين کي سول ايوارڊ واپس وٺڻ يا منسوخ ڪرڻ جو حڪم نٿي ڏئي سگهي.لاهور هاءِ ڪورٽ پنهنجي ريمارڪس ۾ چيو ته 26 هين آئيني ترميم ذريعي عوامي خدمت کي آئين جي آرٽيڪل 259 جي شق 2 ۾ به شامل ڪيو ويو آهي.
