ڪراچي(اسٽاف رپورٽر) عدالتي ڪميشن جي ترجمان ٻڌايو آهي ته مير رضا علي جي قتل جي جاچ لاءِ جوڙيل ڪميشن ڌرين کي جمعي لاءِ نوٽيس جاري ڪري ڇڏيا.
ڪراچي سان تعلق رکندڙ 25 سالن جو ڪاروباري نوجوان مير رضا علي گذريل مهيني 29 تاريخ تي گُلستانِ جوهر ۾ گولي لڳل لاش جي صورت ۾ مليو هو. کيس هڪ ڏينهن اڳ گم ٿيل قرار ڏنو ويو هو. مقتول جي خاندان جي اعتراضن باوجود صوبائي حڪومت آچر ڏينهن ڪيس جي جاچ جو جائزو وٺڻ لاءِ عدالتي ڪميشن قائم ڪرڻ جو فيصلو ڪيو هو.
نوٽيس قتل ٿيل ڪاروباري نوجوان جي خاندان ۽ سنڌ حڪومت جي فوڪل پرسن کي، جڏهن ته خاندان جي وڪيل ايڊووڪيٽ جبران ناصر کي پڻ جاري ڪيا ويا آهن.
مير رضاعلي 28 جولاءِ تي پي اي سي ايڇ ايس، بلاڪ-2 ۾ پنهنجي گهر مان گم ٿيو هو. ٻئي ڏينهن سندس گولين سان زخمي ٿيل لاش گُلستانِ جوهر ۾ ڪراچي يونيورسٽي جي سامهون هڪ ٽڪريءَ واري علائقي ۾ ٻوڙن مان مليو هو. فيروز آباد پوليس مقتول جي والد مير حسين علي جي فرياد تي پاڪستان پينل ڪوڊ (PPC) جي قلمن 365، 302 ۽ 201 تحت ڪيس داخل ڪيو.
سنڌ حڪومت آچر ڏينهن چيو هو ته اها صوبائي هاءِ ڪورٽ جي چيف جسٽس کي درخواست ڪندي ته هڪ عدالتي ڪميشن قائم ڪيو وڃي، جيڪو اهو طئي ڪري ته ڇا ڪيس جي جاچ غيرجانبداري سان ۽ قانون موجب ڪئي پئي وڃي يا نه.
بهرحال، ان اعلان کان ٿوري ئي دير پوءِ خاندان ايڊووڪيٽ ناصر معرفت سنڌ هاءِ ڪورٽ ۾ درخواست داخل ڪئي، جنهن ۾ عدالتي ڪميشن قائم ڪرڻ جو فيصلو رد ڪرڻ ۽ ان جي بدران گڏيل جاچ ٽيم (JIT) جوڙڻ جي استدعا ڪئي وئي.
درخواست ۾ سنڌ حڪومت، سنڌ هوم ڊپارٽمينٽ، صوبائي انسپيڪٽر جنرل آف پوليس، ڪراچي جي ايڊيشنل انسپيڪٽر جنرل آف پوليس، وفاق پاڪستان ۽ دفاع واري وزارت سميت 19 ڌرين کي جوابدار ڌرين طور نامزد ڪيو ويو.
درخواستگذارن عدالت کان استدعا ڪئي ته سنڌ حڪومت طرفان عدالتي ڪميشن قائم ڪرڻ جو فيصلو، ۽ ان جي نتيجي ۾ شروع ٿيندڙ سڀ ڪارروايون به رد ڪيون وڃن.
ان جي بدران عدالت کان درخواست ڪئي وئي ته هڪ ”آزاد، غيرجانبدار ۽ مختلف ادارن تي ٻڌل گڏيل جاچ ٽيم (JIT)” قائم ڪرڻ جا حڪم جاري ڪيا وڃن، جنهن ۾ سنڌ پوليس، رينجرز، وفاقي جاچ اداري (FIA)، انٽيليجنس بيورو (IB)، انٽر سروسز انٽيليجنس (ISI) ۽ ملٽري انٽيليجنس جا اهلڪار شامل هجن. ان ٽيم جو سربراهه اهڙو سينيئر آفيسر هجي، جنهن جي ايمانداري تي ڪو سوال نه هجي ۽ جيڪو اڳ ۾ هن ڪيس جي جاچ ۾ شامل نه رهيو هجي.
درخواست ۾ موقف اختيار ڪيو ويو ته ٽيم جي سربراهه کي علي جي ”اغوا، تشدد ۽ قتل جي تازي ۽ جامع جاچ“ ڪرڻ گهرجي.
مير رضا علي جو ساندان شروع کان وٺي چوي پيو ته کيس اغوا ڪري، تشدد جو نشانو بڻائي قتل ڪيو ويو، پر پوليس شروعاتي طور تي ان کي خودڪشي قرار ڏئي رهي هئي. ابتدائي پوسٽ مارٽم ۾ به تشدد جو ذڪر نه هو.
علي جي لاش کي قبر مان ڪڍڻ ۽ ٻيهر پوسٽ مارٽم ڪرائڻ کان پوءِ ايف آءِ آ ۾ آخرڪار قتل جو قلم شامل ڪيو ويو. ٻي پوسٽ مارٽم مان معلوم ٿيو ته سندس جسم تي ڪيترائي زخم هئا ۽ کيس پٺيءَ ۾ گولي لڳي هئي، جنهن سان خودڪشي جو امڪان رد ٿي ويو.
ٻيو پوسٽ مارٽم ڪراچي جي پوليس سرجن ۽ جاچ ڪندڙن وچ ۾ علي جي پهرين پوسٽ مارٽم بابت ميڊيڪو ليگل رپورٽ ۾ مبينا خامين تي تڪرار کان پوءِ ڪرايو ويو.
6 آگسٽ تي جوڊيشل مئجسٽريٽ علي جي والد طرفان داخل ڪيل درخواست تي لاش قبر مان ڪڍڻ جي اجازت ڏني ۽ پوليس سرجن ۽ سنڌ جي صحت واري سيڪريٽري کي هدايت ڪئي ته لاش ڪڍڻ لاءِ هڪ ميڊيڪل بورڊ جوڙيو وڃي.
سنڌ جي صحت کاتي ان کان پوءِ اٺ رڪني ميڊيڪل بورڊ قائم ڪيو، جنهن جي ڪنوينر پوليس سرجن ڊاڪٽر سميه سيد کي مقرر ڪيو ويو. پر 7 آگسٽ جي شروعاتي ڪلاڪن ۾ سنڌ صحت کاتي جي ڊائريڪٽر جنرل جي حڪم ذريعي بورڊ ٻيهر جوڙيو ويو.
ڊاڪٽر سميه سيد نئين پنج رڪني بورڊ جي به ڪنوينر برقرار رهي، پر ان جا ٻيا ميمبر تبديل ڪيا ويا.
علي جي خاندان نئين ميڊيڪل بورڊ کي رد ڪري ڇڏيو، جنهن جي نتيجي ۾ جمعي تي رٿيل قبر ڪشائي به ملتوي ٿي وئي. ان دوران ايڊووڪيٽ ناصر اختيارين تي حقيقتون لڪائڻ جو الزام لڳايو.
ان کان پوءِ سنڌ حڪومت اصل ميڊيڪل بورڊ بحال ڪيو، جنهن کان پوءِ 8 آگسٽ تي علي جي قبر ڪشائي ڪئي وئي.
هڪ ڏينهن پوءِ سنڌ جي انسپيڪٽر جنرل آف پوليس جي آفيس علي جي موت جي جاچ ڪندڙ ٽيم کي ٻيهر جوڙڻ جو نوٽيفڪيشن جاري ڪيو. ان دوران ڪراچي جي ايڊيشنل آءِ جي آزاد خان، علي جي قتل جي جاچ فيروز آباد ٿاڻي کان منتقل ڪري زمان ٽائون ٿاڻي حوالي ڪئي، جتي ڪيس داخل ٿيل هو.
ساڳئي ڏينهن سنڌ حڪومت ڪيس جي جاچ لاءِ عدالتي ڪميشن قائم ڪرڻ جو فيصلو ڪيو، پر هڪ ڏينهن پوءِ اهو منصوبو ملتوي ڪري ڇڏيو، ڇاڪاڻ ته علي جي خاندان چيو هو ته هنن اهڙو ڪو مطالبو نه ڪيو هو ۽ کين نئين جاچ ٽيم تي اعتماد آهي.
19 آگسٽ تي علي جي والدين، مير حسين ۽ مريم حسين، سنڌ جي وڏي وزير مراد علي شاهه کي خط لکيو، جنهن ۾ مقتول ڪاروباري نوجوان جي موت واري قتل ڪيس جي جاچ جي ”سڌي نگراني“ ڪرڻ جي درخواست ڪئي وئي.
هنن وڏي وزير کان اهو به مطالبو ڪيو ته اڳوڻي جاچ ٽيم خلاف جاچ ۽ کاتي اندر انڪوائري ڪرائي وڃي ۽ ان ۾ شامل آفيسرن کي فوري طور معطل ڪيو وڃي.
آچر ڏينهن صوبائي حڪومت ان خط جي وصوليءَ جي تصديق ڪئي ۽ اعلان ڪيو ته هڪ عدالتي ڪميشن قائم ڪيو ويندو، جيڪو اهو طئي ڪندو ته ڪيس جي جاچ غيرجانبداري سان ۽ قانون موجب ٿي رهي آهي يا نه.
بهرحال، اعلان کان ٿوري ئي دير پوءِ علي جي خاندان جي وڪيل اعتراض ڪندي چيو ته هو ان معاملي تي سنڌ هاءِ ڪورٽ سان رجوع ڪندا.
خاندان جي وڪيل جو موقف هو ته خاندان کي عدالتي ڪميشن بابت آگاهه نه ڪيو ويو، ڪميشن جا شرائطِ ڪار ظاهر نه ڪيا ويا ۽ پوليس اڃا تائين مئجسٽريٽ آڏو جاچ رپورٽ به جمع نه ڪرائي آهي.
