ليڊز (اسپورٽس ڊيسڪ) ليڊز ٽيسٽ دوران هڪ انوکو واقعو سامهون آيو، جتي ميچ جي بال کي وچ مان ڪاٽي ٻن حصن ۾ ورهائي ڇڏيو ويو.پهرين اننگز ۾ پاڪستان کي 171 رنسن تي آئوٽ ڪرڻ کانپوءِ انگلينڊ ٽيم جي رانديگرن بال جا ٻه ٽڪرا ڪري ڇڏيا. پهرين اننگز ۾ اولي رابنسن ۽ جوش ٽنگ 5-5 وڪيٽون حاصل ڪيون هيون.عام طور تي 5 وڪيٽون وٺندڙ بالر يادگار طور بال پنهنجي وٽ رکندو آهي، پر جوش ٽنگ اننگز کانپوءِ اولي رابنسن کي بال اڌو اڌ ڪرڻ جو انوکو مشورو ڏنو.ڊريسنگ روم ۾ گراؤنڊ اسٽاف بال کي وچ مان ڪاٽي ٻن ٽڪرن ۾ تبديل ڪري کين ڏئي ڇڏيو. اولي رابنسن چيو ته اڌ بال جهڙي شيءِ روز روز ناهي ملندي، ان ڪري هي اهڙي يادگار آهي جنهن کي اسين ڪڏهن به نه وسارينداسين.
