ڪراچي (اسٽاف رپورٽر): سنڌ جي وڏي وزير سيد مراد علي شاهه، ناڻي وارو وفاقي وزير سينيٽر محمد اورنگزيب سان گڏ ڇنڇر جي شام سيفي هاسپيٽل جي نئين اڏاوت ٿيل 11 ماڙ ڪارڊياڪ ونگ جو افتتاح ڪيو جيڪو ڪراچي جي هيلٿ ڪيئر انفراسٽرڪچر ۾ هڪ وڏو اضافو آهي جيڪو هڪ ئي ڇت هيٺ دل جي بيمارين جي جديد تشخيص، علاج، سرجري، آئي سي يو ۽ بحالي جون سهولتون فراهم ڪندو. هي مقصد تحت اڏيل سهولت، حضور عالي ڊاڪٽر سيدنا مفضل سيف الدين جي رهنمائي ۽ سرپرستي هيٺ قائم ڪئي وئي آهي جيڪا پاڪستان ۾ صحت جي سار سنڀال ۽ سماجي ترقي ۾ دائودي بوهرا برادري جي حصي ۾ هڪ اهم سنگ ميل جي نمائندگي ڪري ٿي. افتتاحي تقريب نارٿ ناظم آباد ۾ الجامعۃ السيفيہ يونيورسٽي جي آڊيٽوريم ۾ منعقد ٿي جنهن ۾ حضور عالي ڊاڪٽر سيدنا مفضل سيف الدين جي نمائندگي ڪندي شهزاده قصي وجيهه الدين، وفاقي وزير خزانه سينيٽر محمد اورنگزيب، صوبائي وزير رياض حسين شاهه شيرازي، ايم اين اي ڊاڪٽر اختيار بيگ، ميئر ڪراچي بيرسٽر مرتضيٰ وهاب، وڏي وزير جو پرنسپل سيڪريٽري آغا واصف، سائبر نائف سيفي جا پروفيسر طارق محمود، صحت جا پيشيور ماهر، سفارتڪار، ڪاروباري اڳواڻ، دائودي بوهرا برادري جا ميمبر ۽ ٻين معزز مهمانن شرڪت ڪئي. پڄڻ تي وڏي وزير باقاعدي طور تي جديد ترين ڪارڊياڪ ونگ جو افتتاح ڪيو ۽ نئين مڪمل ٿيل سهولت جي مختلف حصن جو دورو ڪيو. کيس ان جي جديد طبي سامان، دل جي سار سنڀال جي مخصوص خدمتن، جديد تشخيصي نظامن ۽ علاج جي سهولتن بابت بريفنگ ڏني وئي. تقريب کي خطاب ڪندي وڏي وزير سيد مراد علي شاهه دائودي بوهرا برادري، سيفي هاسپيٽل جي ٽرسٽين ۽ طبي برادري کي مبارڪباد ڏني، جنهن کي هن هڪ عالمي معيار جو هيلٿ ڪيئر پروجيڪٽ قرار ڏنو، جنهن سان نه صرف ڪراچي پر سڄي سنڌ ۽ پاڪستان جي مريضن کي فائدو ٿيندو. هن چيو ته اهو ڏسي حوصلا افزائي ٿئي ٿي ته ڪراچي جي سڀ کان وڌيڪ ڳتيل آبادي واري ضلعي ۾ اهڙي جديد ۽ ترقي يافته دل جي اسپتال قائم ڪئي وئي آهي. هي سهولت اعليٰ معيار جو ڪارڊياڪ علاج فراهم ڪندي ۽ صوبي ۾ دل جي بيمارين جي مخصوص هيلٿ ڪيئر سروسز کي نمايان طور تي مضبوط ڪندي. وڏي وزير حضور علي ڊاڪٽر سيدنا مفضل سيف الدين جي قيادت کي عوامي فلاح و بهبود، صحت ۽ تعليم لاءِ سندن اڻٿڪ عزم تي خراج تحسين پيش ڪندي چيو ته سندن رهنمائي ۾ قائم ٿيل ادارا انسانيت جي بي غرض خدمت جي جذبي جي عڪاسي ڪن ٿا. هن وڌيڪ چيو ته جيڪو فلسفو انهن ڪوششن جي رهنمائي ڪري ٿو اهو آهي ‘خدمت’ – انسانيت جي خدمت. اهو اسان کي ياد ڏياري ٿو ته جڏهن به اسان وٽ ڪنهن جي زندگي کي بهتر بنائڻ جي صلاحيت هجي، اسان کي اهو ضرور ڪرڻ گهرجي. هي اصول سڀني برادرين ۽ پس منظرن کان مٿانهون آهي ۽ هڪ انسان جي حيثيت ۾ اسان جي گڏيل ذميواري جي عڪاسي ڪري ٿو. وڏي وزير دائودي بوهرا برادري ۽ پاڪستان جي وچ ۾ ديرينه لاڳاپن کي نمايان ڪيو ملڪ جي شروعاتي سالن دوران قائد اعظم محمد علي جناح سان گڏ حضور اقدس ڊاڪٽر سيدنا طاهر سيف الدين جي موجودگي کي ياد ڪيو. هن چيو ته برادري صحت، تعليم ۽ سماجي فلاح و بهبود جي شعبن ۾ قدمن ذريعي پاڪستان جي ترقي ۾ اهم ڪردار ادا ڪندي رهي آهي. نئين افتتاح ٿيل ڪارڊياڪ ونگ جو حوالو ڏيندي وڏي وزير ان کي مخصوص صحت جي خدمتن ۾ انساني جانيون بچائڻ ۾ هڪ وڏي اڳڀرائي ۽ هڪ اهم سيڙپڪاري قرار ڏنو. هن چيو دل جي بيماري اسان جي دور جي وڏن صحت جي چئلينجن مان هڪ آهي. وقت سر ۽ مخصوص ڪارڊياڪ ڪيئر تائين پهچ زندگي ۽ موت جي وچ ۾ فرق ٿي سگهي ٿي. تنهنڪري هي ڪارڊياڪ ونگ رڳو انفراسٽرڪچر جي توسيع ناهي پر جانيون بچائڻ ۾ هڪ سيڙپڪاري آهي. هن چيو ته هي سهولت دل جي سار سنڀال جي سموري سلسلي کي گڏ ڪري ٿي، جنهن ۾ ايمرجنسي ريسپونس، تشخيص، انٽروينشنل ڪارڊيالوجي، ڪارڊياڪ سرجري، انتهائي نگہداشت، داخل مريضن جي صحتيابي ۽ بحالي شامل آهن. وڏي وزير چيو ته هو خاص طور تي عمارت جي اڏاوت جي معيار، جديد ڪيٿ ليبز، جديد آپريشن ٿيئٽرز ۽ سڄي بلڊنگ ۾ نصب ڪيل جديد ترين طبي ٽيڪنالاجي جي معيار کان متاثر ٿيو آهي. هن چيو ته اسان سهولت جي سڀني ماڙن جو دورو ڪيو ۽ اڏاوت جي معيار کي غير معمولي ڏٺو. طبي سامان، ڪيٿ ليبز، آپريشن ٿيئٽرز ۽ مريضن جي سار سنڀال جا نظام واقعي متاثر ڪندڙ آهن ۽ معيار جي هيلٿ ڪيئر لاءِ هڪ معيار قائم ڪن ٿا. سنڌ جي مخصوص ڪارڊياڪ ادارن جي وڌندڙ نيٽ ورڪ کي نمايان ڪندي وڏي وزير چيو ته صوبو اڳ ئي نيشنل انسٽيٽيوٽ آف ڪارڊيوويسڪولر ڊيزيزز (NICVD) ۽ سنڌ انسٽيٽيوٽ آف ڪارڊيوويسڪولر ڊيزيزز (SICVD) جهڙن ادارن تي فخر ڪري ٿو، جيڪي گڏجي لڳ ڀڳ 2,100 بسترن جي سهولت فراهم ڪن ٿا. هن وڌيڪ چيو ته سنڌ هن وقت 10 ڪارڊياڪ اسپتالون، 29 چيسٽ پين يونٽس، 14 ڪيٿ ليبز ۽ نو ڪارڊياڪ آپريشن ٿيئٽرز هلائي رهي آهي. وقت سر علاج جي اهميت تي زور ڏيندي هن چيو ته ڪارڊياڪ ايمرجنسي ۾ هر منٽ اهم هوندو آهي ۽ وڏي آبادي وارن مرڪزن جي ويجهو مخصوص سهولتن تائين پهچ بقا جي شرح کي نمايان طور تي بهتر بڻائي سگهي ٿي. هن چيو ته ضلعي سينٽرل کي اهڙي نوعيت جي هڪ جديد ڪارڊياڪ سهولت جي سخت ضرورت هئي. دل جي مريضن لاءِ، وقت انتهائي قيمتي آهي ۽ اسپتال تائين جلدي پهچڻ سان جانيون بچي سگهن ٿيون. هن چيو هيلٿ ڪيئر جي چئلينجن کي رڳو حڪومتون حل نٿيون ڪري سگهن. انهن لاءِ پارٽنرشپ، جدت ۽ عوام جي فلاح و بهبود لاءِ گڏيل عزم جي ضرورت آهي. سيفي هاسپيٽل جو ڪارڊياڪ ونگ ان ڳالهه جو هڪ شاندار مثال آهي ته اهڙي تعاون ذريعي ڇا حاصل ڪري سگهجي ٿو. هن چيو ته مون ذاتي طور تي دائودي بوهرا برادري جي وقف ۽ بي غرض جذبي جو مشاهدو ڪيو آهي. عزم ۽ مقصد سان گڏجي ڪم ڪرڻ جي سندن صلاحيت واقعي غير معمولي آهي. پروجيڪٽ جي مستقبل جي اثر تي اعتماد جو اظهار ڪندي، وڏي وزير چيو ته نئون ڪارڊياڪ ونگ نه رڳو ڪراچي پر سڄي ملڪ لاءِ هڪ نمونو هيلٿ ڪيئر ادارو بڻجندو. هن چيو هي سهولت ذاتي طور تي ڏسڻ کانپوءِ، مان وثوق سان چئي سگهان ٿو ته اها دنيا جي ڪنهن به بهترين ڪارڊياڪ اسپتال جو مقابلو ڪري سگهي ٿي. هي هڪ رهنما مثال بڻجندو ته عوام کي اعليٰ معيار جون هيلٿ ڪيئر خدمتون ڪيئن پهچائڻيون آهن. وفاقي وزير خزانه سينيٽر محمد اورنگزيب تقريب کي خطاب ڪندي پاڪستان جي سماجي ۽ اقتصادي ترقي ۾ دائودي بوهرا برادري جي ديرينه ڪردار جي تعريف ڪئي ۽ دل جي هن نئين سهولت کي ڪراچي جي عوام لاءِ هڪ قيمتي تحفو قرار ڏنو. هن چيو ته ڪنهن قوم جو حقيقي ماپو ان جي دولت ناهي پر اهو آهي ته اها پنهنجي سڀ کان وڌيڪ ڪمزور شهرين سان ڪيئن پيش اچي ٿي. هن چيو قومي ترقي جو حقيقي معيار صرف معاشي انگ اکر ناهن پر غريبن، پٺتي پيل ۽ سماج جي سڀ کان وڌيڪ ڪمزور ميمبرن جي فلاح و بهبود آهي. ناڻي وارو وفاقي وزير زور ڏنو ته حڪومتن ۽ ادارن کي پنهنجي مشڪل ترين لمحن دوران شهرين جي تحفظ ۽ مدد کي ترجيع ڏيڻ گهرجي. هن چيو ته پائيدار معاشي ترقي ان وقت تائين اڌوري رهندي جيستائين ان جا فائدا عام ماڻهن خاص طور تي سڀ کان وڌيڪ ضرورت مندن تائين نه پهچن. ڪراچي کي روشنين، اميدن ۽ وسيع صلاحيتن جو شهر قرار ڏيندي جناب اورنگزيب چيو ته هي شهر ۽ ان جا ماڻهو پاڪستان جي معيشت ۽ قومي ترقي جو ڪرنگهو آهن. هن اعتماد جو اظهار ڪيو ته سيفي هاسپيٽل جي ڪارڊياڪ ونگ جهڙيون سهولتون هيلٿ ڪيئر جي منظرنامي کي مضبوط ڪنديون ۽ ايندڙ نسلن جي خدمت ڪنديون. حضور عالي ڊاڪٽر سيدنا مفضل سيف الدين جي نمائندگي ڪندي شهزاده قصي وجيهه الدين مهمانن کي ڀليڪار چيو ۽ پروجيڪٽ جي پويان واري ويزن کي شيئر ڪيو. هن چيو ته هي قدم حضور اقدس جي ان عزم جي عڪاسي ڪري ٿو ته صحت جون اهڙيون سهولتون فراهم ڪيون وڃن جيڪي اعليٰ بين الاقوامي معيارن تي پوريون لهن ۽ زندگي جي هر شعبي سان تعلق رکندڙ ماڻهن لاءِ دستياب هجن. نئون افتتاح ٿيل ڪارڊياڪ ونگ هڪ خاص مقصد تحت تيار ڪيل 11 ماڙ سهولت آهي جيڪا سيفي هاسپيٽل جي دل جي بيمارين جي علاج جي صلاحيت ۾ نمايان اضافو ڪري ٿي. ان جي اڏاوت 2022 جي شروعات ۾ شروع ٿي هئي، ۽ هن پروجيڪٽ کي ايندڙ نسل جي طبي ٽيڪنالاجي ۽ ڪلينڪل سسٽم سان ليس ڪيو ويو آهي. هن سهولت ۾ 75 مخصوص بسترن، جديد ڪيٿيٽرائيزيشن ليبارٽريون، مخصوص ڪارڊياڪ آپريشن ٿيئٽرز، هڪ جديد ترين سرجيڪل آئي سي يو ۽ هڪ مخصوص بحالي مرڪز شامل آهن. هي جامع خدمتون پيش ڪري ٿو جيڪي ايمرجنسي ڪارڊياڪ ريسپونس ۽ ماهرن جي مشاورت کان وٺي جديد تشخيص، انٽروينشنل ڪارڊيالوجي، ڪارڊياڪ سرجري، نازڪ سار سنڀال ۽ بحالي تائين پکڙيل آهن. سيفي هاسپيٽل جيڪو حضور عالي مرحوم ڊاڪٽر سيدنا محمد برهان الدين پنهنجي معزز والد حضور اقدس مرحوم ڊاڪٽر سيدنا طاهر سيف الدين جي ياد ۾ قائم ڪيو هو ڪراچي جي اهم ملٽي اسپيشلٽي هيلٿ ڪيئر ادارن مان هڪ بڻجي چڪو آهي. سالياني لڳ ڀڳ 360,000 مريضن ۽ پنهنجي ايمرجنسي ۽ او پي ڊي شعبن ذريعي روزانو تقريبن 1,000 ويزيٽرن کي خدمتون فراهم ڪندي هي اسپتال معياري هيلٿ ڪيئر جي فراهمي ۾ پنهنجو ڪردار وڌائڻ جاري رکي ٿي. ڪارڊياڪ ونگ جو افتتاح اسپتال جي سفر ۾ هڪ ٻئي اهم باب جو نشان آهي ۽ صحت جي سار سنڀال ۽ سماجي ترقي جي شعبن ۾ پاڪستان لاءِ دائودي بوهرا برادري جي دائمي ڪردار کي وڌيڪ مضبوط ڪري ٿو.
