راولپنڊي(ويب ڊيسڪ)فوج جي ميڊيا ونگ انٽر سروسز پبلڪ رليشنز (آءِ ايس پي آر) اربع ڏينهن جاري ڪيل بيان ۾ چيو آهي ته گذريل 48 ڪلاڪن دوران بلوچستان جي سوراب ۽ مستونگ ضلعن ۾ ڪيل ڪاررواين دوران سيڪيورٽي فورسز 10 دهشتگردن کي ماريو، جڏهن ته ٻن عورت خودڪش بمبارن ۽ سندن هڪ سهولتڪار کي گرفتار ڪيو آهي.
آءِ ايس پي آر موجب سوراب ۾ ست دهشتگرد ماريا ويا، جڏهن ته مستونگ ۾ ٽن دهشتگردن کي ماريو ويو، جتي ٻن عورت خودڪش بمبارن ۽ سندن سهولتڪار کي پڻ گرفتار ڪيو ويو.
بيان ۾ چيو ويو آهي ته بلوچستان ۾ “ڀارت جي سرپرستي هيٺ هلندڙ فتنه الهندستان ۽ فتنه الخوارج جي دهشتگرد نيٽ ورڪ” خلاف جاري ڪاررواين جي تسلسل ۾ انهن ٻنهي ضلعن ۾ آپريشن ڪيا ويا، جن جو مقصد دهشتگردن ۽ انهن جي سهولتڪارن جي باقي رهيل عنصرن جو خاتمو ڪرڻ هو.
رياست پابندي مڙهيل تحريڪ طالبان پاڪستان (ٽي ٽي پي) لاءِ “فتنه الخوارج” جو اصطلاح استعمال ڪري ٿي، جڏهن ته بلوچستان ۾ سرگرم هٿياربند گروهن کي “فتنه الهندستان” جو نالو ڏنو ويو آهي، جنهن جو مقصد پاڪستان ۾ دهشتگردي ۽ عدم استحڪام ۾ ڀارت جي مبينا ڪردار کي اجاگر ڪرڻ آهي.
آءِ ايس پي آر موجب انهن گروهن خلاف ڪاررواين جي سلسلي ۾ گذريل 48 ڪلاڪن دوران مستونگ ۽ سوراب ۾ ڪيترائي انٽيليجنس بنيادن تي آپريشن، علائقن جي صفائي ۽ ٽارگيٽيڊ ڪارروايون ڪيون ويون، جن ۾ 10 دهشتگرد مارجي ويا.
بيان ۾ وڌيڪ چيو ويو ته مستونگ ۾ گرفتار ڪيل ٻن عورت خودڪش بمبارن ۽ سندن سهولتڪار جو تعلق فتنه الهندستان سان آهي.
آءِ ايس پي آر موجب، “دهشتگردن وٽان هٿيار، بارود ۽ دستي طور تي تيار ڪيل ڌماڪيدار اوزار (IEDs) پڻ هٿ ڪيا ويا.”
بيان ۾ وڌيڪ چيو ويو ته، “علائقي ۾ موجود ڀارت جي سرپرستي هيٺ ڪم ڪندڙ ڪنهن به ٻئي دهشتگرد کي ختم ڪرڻ لاءِ سرچ ۽ صفائي واريون ڪارروايون جاري آهن.”
بيان موجب، “قومي ايڪشن پلان بابت وفاقي ايپڪس ڪميٽي جي منظوري سان شروع ڪيل ’عزمِ استحڪام‘ ويزن تحت پاڪستان جون سيڪيورٽي فورسون ۽ قانون لاڳو ڪندڙ ادارا پرڏيهي سرپرستي ۽ سهڪار سان هلندڙ دهشتگردي جي ناسور جي مڪمل خاتمي لاءِ بي لاڳاپي سان ۽ ڀرپور رفتار سان دهشتگردي خلاف مهم جاري رکندا.”
مستونگ ۽ سوراب ۾ سيڪيورٽي فورسن جون تازيون ڪارروايون اهڙي وقت سامهون آيون آهن، جڏهن بلوچستان اڃا تائين سنگين امن امان جي چئلينجن کي منهن ڏئي رهيو آهي.
هن مهيني جي شروعات ۾، 6 جولاءِ تي ضلعي زيارت جي منگي ڊيم پمپنگ اسٽيشن تي قائم پوليس چوڪيءَ تي ٿيل خونريز حملي جي جواب ۾ سيڪيورٽي فورسن ۽ قانون لاڳو ڪندڙ ادارن گڏيل طور “آپريشن شعبان” شروع ڪيو هو. ان حملي دوران هٿياربند حملي آورن 27 پوليس اهلڪارن کي اغوا ڪرڻ کانپوءِ قتل ڪري ڇڏيو هو.
جون جي شروعات ۾ پاڪستان انسٽيٽيوٽ فار ڪانفلڪٽ اينڊ سيڪيورٽي اسٽڊيز (PICSS) پاران جاري ڪيل ماهوار سيڪيورٽي جائزي ۾ چيو ويو هو ته ٻن مهينن تائين بهتري کانپوءِ مئي دوران پاڪستان جي سيڪيورٽي صورتحال ۾ تيزي سان خرابي آئي، جنهن جو وڏو سبب خيبرپختونخوا ۽ بلوچستان ۾ وڌندڙ دهشتگرد حملا هئا.
رپورٽ موجب، مئي مهيني دوران بلوچستان سڀ کان وڌيڪ متاثر صوبو رهيو، جتي 71 دهشتگرد حملا رڪارڊ ڪيا ويا، جڏهن ته اپريل ۾ اهڙن حملن جو انگ 34 هو، يعني حملن ۾ 109 سيڪڙو اضافو ٿيو.
رپورٽ ۾ چيو ويو ته خراب ٿيندڙ سيڪيورٽي صورتحال اغوا جي واقعن ۾ واڌ مان پڻ ظاهر ٿئي ٿي. مئي دوران ملڪ ڀر ۾ رپورٽ ٿيل 54 اغوا جي واقعن مان 52 رڳو بلوچستان ۾ پيش آيا، جيڪو صوبي ۾ دهشتگرد گروهن جي وڌندڙ ڪارروائي جي صلاحيت ۽ اعتماد جي عڪاسي ڪري ٿو.
