واشنگٽن(ويب ڊيسڪ) آمريڪي صدر ڊونالڊ ٽرمپ ايران سان جنگ بندي ۾ واڌ جي معاهدي تي فيصلو نه ڪري سگهيو.آمريڪي اخبار نيو يارڪ ٽائمز موجب، ايران جي معاملي تي صدر ٽرمپ جي اڳواڻي ۾ وائيٽ هائوس سچوئيشن روم ۾ 2 ڪلاڪن تائين اهم اجلاس جاري رهيو. نيو يارڪ ٽائمز موجب، ايران معاهدي تي ٽرمپ جو حتمي فيصلو ملتوي ٿي ويو ۽ اجلاس بنا ڪنهن نتيجي جي ختم ڪيو ويو. وائيٽ هائوس پاران پڻ سچوئيشن روم اجلاس ختم ٿيڻ جي تصديق ڪئي وئي آهي، پر تفصيل جاري نه ڪيا ويا آهن. وائيٽ هائوس اختيارين جو چوڻ آهي ته صدر ٽرمپ صرف ان معاهدي کي قبول ڪندو جيڪو آمريڪي شرطن تي پورو لهندو. اختيارين موجب، ايران ڪڏهن به جوهري هٿيار حاصل نٿو ڪري سگهي، آمريڪا جي مفاد ۽ ٽرمپ جي شرطن موجب ئي ايران ڊيل (معاهدو) ممڪن آهي. ان کان اڳ، صدر ڊونالڊ ٽرمپ ايران جي بحري ناڪابندي ختم ڪرڻ جو اعلان ڪيو هو ۽ چيو هو ته جيڪي جهاز اسان جي شاندار ۽ بي مثال ناڪابندي جي ڪري آبناءِ هرمز ۾ ڦاٿل هئا، اهي هاڻي گهر واپسي جو عمل شروع ڪري سگهن ٿا، ۽ آبناءِ هرمز مان سڀئي بحري بارودي سرنگهون ختم ڪيون وينديون.
ناڪابندي جاري آهي، ٽرمپ ’ٽيون ڀيرو سفارتڪاري سان غداري‘ ڪئي آهي، رضائي
ايران جي پاسدارانِ انقلاب جي اڳوڻي ڪمانڊر محسن رضائي آمريڪي صدر ڊونلڊ ٽرمپ تي ايران خلاف سامونڊي ناڪابندي جاري رکڻ ۽ ڳالهين دوران ”حد کان وڌيڪ مطالبا“ ڪرڻ ذريعي ”ٽيون ڀيرو سفارتڪاري سان غداري“ ڪرڻ جو الزام لڳايو آهي۔ مجتبيٰ خامنه اي پنهنجي والد جي جاءِ تي اسلامي جمهوريه ايران جو ٽيون سپريم ليڊر بڻجڻ کان پوءِ، ايراني ميڊيا رپورٽ ڪيو آهي ته هن محسن رضائي کي پنهنجو فوجي صلاحڪار مقرر ڪيو آهي۔ رضائي ايڪس (X) تي پنهنجي پوسٽ ۾ لکيو ته ڊونلڊ ٽرمپ ”هڪ ڀيرو ٻيهر ثابت ڪيو آهي ته هو ڳالهين ڪندڙ جي حيثيت سان اهل ناهن ۽ ٻين مقصدن جي حاصلات جي ڪوشش ڪري رهيا آهن.“ ايراني ۽ آمريڪي عملدارن 12 ڏينهن واري جنگ جي شروعات ۽ تازي جنگ دوران ايران سان ڳالهين جي وچ ۾ فوجي حملو ڪرڻ ۽ ”سفارتڪاري سان غداري“ ڪرڻ تي بار بار آمريڪا تي تنقيد ڪئي آهي.
هرمز ۾ بارودي سرنگ بابت عمان پاران الرٽ جاري
عمان جي بحري سلامتي مرڪز هڪ هدايت جاري ڪندي سڀني جهازن کي آبنائي هرمز مان گذرڻ دوران انتهائي احتياط ڪرڻ جي اپيل ڪئي آهي، ڇاڪاڻ ته عمان جي علائقائي سامونڊي حدن اندر آبنائي هرمز جي اولهه طرف هڪ ”ترندڙ شيءِ، جنهن بابت شڪ آهي ته اها سامونڊي بارودي سرنگ (سي مائن) ٿي سگهي ٿي“، ڏٺي وئي آهي۔ مرڪز ايڪس (X) تي پنهنجي بيان ۾ چيو آهي ته: ”بحري سلامتي مرڪز سڀني سامونڊي مسافرن، مهاڻن ۽ جهازن کي اپيل ڪري ٿو ته هو نيويگيشن دوران وڌ کان وڌ احتياط ۽ چوڪسي اختيار ڪن، ڪنهن به مشڪوڪ شيءِ کان پري رهن ۽ ان بابت فوري طور لاڳاپيل اختيارين کي آگاهه ڪن.“
هرمز ۾ سيڪورٽي جي صورتحال ’سنگين‘ آهي، ميري ٽائيم ايجنسي
هندي سمنڊ ۾ بحري سلامتي جي نگراني ڪندڙ گهڻ ملڪي اداري جوائنٽ ميري ٽائيم انفارميشن سينٽر (JMIC) موجب، ايران سان لاڳاپيل بندرگاهي سهولتن خلاف جاري آمريڪي سامونڊي ناڪابندي سبب آبنائي هرمز ۾ خطري جي سطح اڃا تائين ”انتہائی سنگين“ آهي۔ هي اطلاع ايڪس تي برطانيا جي يو ڪي ميري ٽائيم ٽريڊ آپريشنز (UKMTO) اداري پاران به شيئر ڪيو ويو آهي۔ اداري چيو ته: ”سامونڊي جهاز هلائيندڙن کي بحري فوج جي وڌندڙ موجودگي، سيڪيورٽي قدمن ۾ اضافو، وي ايڇ ايف (VHF) ريڊيو ذريعي ممڪن رابطا، ۽ لنگرانداز ٿيڻ وارن علائقن جي ويجهو رش وڌڻ جي اميد رکڻ گهرجي.“
ضرورت پئي ته ايران خلاف فوجي آپريشن ٻيهر شروع ڪري سگهجي ٿو: هيگسيٿ
آمريڪي جنگي وزير (وزيرِ دفاع) پيٽ هيگسيٿ جو چوڻ آهي ته ايران جوهري هٿيار حاصل نٿو ڪري سگهي، ضرورت پئي ته ايران خلاف فوجي آپريشن ٻيهر شروع ڪري سگهجي ٿو.آمريڪي جنگي وزير پيٽ هيگسيٿ سنگاپور ۾ خطاب ڪندي چيو ته ايران سان ٻيهر جنگ شروع ٿيڻ جي صورت ۾ آمريڪي فوج پوريءَ طرح تيار آهي، آمريڪي اسلحو وڏي مقدار ۾ موجود آهي ۽ ڪنهن به ڪارروائي لاءِ هو مڪمل طور تي تيار آهن. هن چيو ته ايران سان ڪوبه معاهدو هڪ سٺو معاهدو هوندو. آمريڪي جنگي وزير پيٽ هيگسيٿ جو وڌيڪ چوڻ هو ته عالمي سلامتي لاءِ آمريڪا پنهنجيون ذميواريون پوريون ڪندو رهندو، پر آمريڪا هاڻي امير ملڪن جي دفاعي خرچن جو بار نه کڻندو. هن چيو ته چين سميت ڪوبه ملڪ خطي تي پنهنجي بالادستي قائم نٿو ڪري سگهي، بحرالڪاهل (Pacific) ۾ ڪنهن به بالادستي سان طاقت جو توازن بگڙجي ويندو. آمريڪي جنگي وزير پيٽ هيگسيٿ جو چوڻ هو ته چين کي خطي ۾ آمريڪا جي پوزيشن جو احترام ڪرڻو پوندو.
