پشاور )ويب ڊيسڪ)پشاور هاءِ ڪورٽ ڪي پي پوليس ترميمي ايڪٽ 2024 کي ڪالعدم قرار ڏيندي خيبرپختونخوا پوليس ترميمي ايڪٽ 2024 خلاف درخواست تي تحريري فيصلو جاري ڪري ڇڏيو.عدالتي حڪم ۾ گريڊ 18 ۽ ان کان مٿي جي اعليٰ پوليس آفيسرن جي مقررين کي وڏي وزير جي منظوري سان مشروط ڪرڻ کي غير آئيني قرار ڏنو ويو. آءِ جي پوليس کان فيلڊ ڪمانڊرن جي مقرري جو اختيار واپس وٺڻ غير قانوني آهي.پشاور هاءِ ڪورٽ جو چوڻ آهي ته ايڪٽ ۾ ترميمون پوليس جي عملي خودمختياري کي ختم ڪن ٿيون ۽ ان کي سياسي اوزار ۾ تبديل ڪن ٿيون. آئيني نظام تحت، انتظاميه جي نگراني صرف پاليسي جي رهنمائي تائين محدود هجڻ گهرجي. روزاني انتظامي معاملا، ٽرانسفر ۽ پوسٽنگ آءِ جي وٽ هجڻ گهرجن ته جيئن ڪمانڊ هم آهنگ هجي ۽ نظم و ضبط برقرار رهي.عدالت چيو ته هڪ غير سياسي ۽ عملي طور تي خودمختيار پوليس فورس هڪ آئيني ضرورت آهي، وڏي وزير جو عام اختيار پاليسي معاملن تائين محدود آهي، انفرادي آفيسرن جي مقرري يا منتقلي تائين نه، ۽ آءِ جي کي نظرانداز ڪندي فيلڊ ڪمانڊرن تي ڪنٽرول ڪمانڊ اسٽرڪچر کي ٽوڙي ٿو.پشاور هاءِ ڪورٽ جي حڪم ۾ چيو ويو آهي ته قانون لاڳو ڪرڻ جي ذميواري پوليس چيف تي آهي ۽ هو صرف قانون جي آڏو جوابده آهي.
