اسلام آباد (ويب ڊيسڪ) شجاع نواز جو ڪتاب “دي بيٽل فار پاڪستان” جي هلندڙ مهيني ڪراچي، لاهور ۽ اسلام آباد ۾ رٿيل مهورتي تقريب عين وقت تي مبينه طور پاڪستاني فوج ملتوي ڪرائي ڇڏي. شجاع نواز اڳوڻي آرمي چيف جنرل آصف نواز جو ڀاءَ آهي ۽ سائوٿ ايشيا سينٽر جيڪو امريڪي ٿنڪ ٽئنڪ سان سلهاڙيل آهي، ان ۾ ڪم ڪندو آهي. تنهن 24 ڊسمبر تي فيس بوڪ تي چيو ته ڪافي دوست پڇن ٿا ته تقريب ڇو ملتوي ٿي ۽ ڪنهن ڪرائي ته انهن کي ٻڌائڻ گهران ٿو ته آرگنائيزرز کيس ٻڌايو آهي ته فوج ملتوي ڪرائي آهي. اڳ ۾ مونکي چيو ويو ته ملتوي ڪريو انڪار ڪرڻ بعد هنن پاڻ ڪرائي ڇڏي ۽ بهتر آهي ته ان بابت فوج کان پڇو وڃي. سندس ڪتاب جو رويو خالد احمد فرائيڊي ٽائمز ۾ لکيو آهي.
جنهن ۾ هن ٻڌايو آهي ته ڪتاب 2008 کان وٺي پاڪستان ۽ آمريڪي تعلقات ۾ هيٺ مٿانهين ۽ انکي مستقبل ۾ بهتر ڪرڻ بابت فوڪس آهي. بي بي سي به ڪتاب بابت استوري شايع ڪئي آهي. جنهن ۾ ٻڌايو ويو آهي ته 2014 ۾ عمران خان جي ڌرڻي جي تڏهوڪو آءِ ايس آءِ جو چيف ليفٽيننت جنل ظهير الاسلام حمايت ڪري پيو ۽ هن ڪجهه ڪور ڪمانڊرز سان به ڳالهايو هو . شجاع نواز لکيو آهي ته ان وقت آمريڪي سفير رچرڊ اولسن کيس ٻڌايو ته جنرل ظهير حڪومت جو تختو اونڌو ڪرڻ چاهي پيو پر جنرل راحيل شريف کيس روڪي ڇڏيو ۽ عهدي تان هٽائي ڇڏيو هو. ڪتاب ۾ شجاع نواز اسامه بن لادن بابت هڪ پورو باب شامل ڪيو آهي “تورا بورا کان پٺاڻ گلي تائين”. جنهن ۾ هن لکيو آهي ته اسامه بن لادن کي گرفتار ڪرائڻ ۾ پاڪستان فوج جي ڪيترن آفيسرن آمريڪي عملدارن جي مدد ڪئي. انهن ۾ اهم ڪردار انٽيلي جنس سروس جو ريٽائرڊ ليفٽيننٽ ڪرنل اقبال سعيد خان جو هو. جنهن کي فوج مان ڪرنسي ڪيس ۾ قبل از وقت رٽائر ڪيو ويو هو ۽ هن سيڪورٽي ڪمپني قائم ڪئي هئي. هو ملٽري انٽيليجنس ۾ به رهيو هو ۽ فوج ۾ کيس اڪثر ٻيلي سڏيندا هئا. شجاع نواز لکيو آهي ته هن ايبٽ آباد ۾ جيڪا آفيس کولي هئي اها آمريڪي استعمال ڪندا هئا. ايبٽ آباد آپريشن کان هڪدم پوءِ هو ملڪ ڇڏي آمريڪا هليو ويو. ڊفينس هائوسنگ وارو گهر ۽ ٻئي گهراوري جيڪا بيمار هئي ان باوجود به فور ملڪ ڇڏي ويو ۽ سندس سيڪورٽي ڪمپني جي مئنيجر بعد ۾ اهو گهر کپايو هو. جيڪو هن وقت سان ڊياگو ۾ پنهنجي 24 لک ڊالر جي حويلي ۾ رهي ٿو ۽ وٽس سفيد رنگ جي بي ايم ڊبليو ڪار به آهي.
ڪتاب ۾ هن لکيو آهي ته اسامه بن لادن 6 سال ايبٽ آباد واري گهر ۾ رهيو، پلاٽ ارشد خان نالي پٺاڻ 7 ڪنال 5 مرلن جو پلاٽ 2004 ۾ 50 لک ۾ خريد ڪيو جيڪو مارڪيٽ قيمت کان 25 سيڪڙو وڌيڪ هو. ان جو نقشو اسامه بن لادن پاڻ ٺاهيو هو جيڪو گهر اندر هڪ گهر هو جتي هو پنهنجي زالن ۽ 16 ٻارن سان گڏ رهندو هو. ارشد خان بعد ۾ آمريڪي حملي ۾ مارجي ويو هو.
