لاهور (ويب ڊيسڪ)مشهور يوٽيوبر سعد الرحمان عرف ڊڪي ڀائي جوا ايپس ڪيس ۾ جسماني ريمانڊ ۾ واڌ کي چئلينج ڪيو آهي.ڊڪي ڀائي لاهور جي جڊيشل مئجسٽريٽ جي جسماني ريمانڊ ۾ واڌ جي فيصلي خلاف اپيل داخل ڪئي آهي. هي اپيل ڇنڇر ڏينهن هڪ وڪيل ذريعي سيشن ڪورٽ ۾ جمع ڪرائي وئي.عدالت اپيل کي ٻڌڻي لاءِ قبول ڪندي نيشنل سائبر ڪرائم انويسٽيگيشن ايجنسي (اين سي سي آءِ اي) کي نوٽيس جاري ڪيو ۽ سومر تائين جواب طلب ڪيو.ڊڪي ڀائي پنهنجي درخواست ۾ موقف اختيار ڪيو آهي ته مئجسٽريٽ حقيقتن جي صحيح جانچ ڪرڻ کانسواءِ ريمانڊ ۾ واڌ جي منظوري ڏني، تنهن ڪري عدالت کي هن حڪم کي ڪالعدم قرار ڏيڻ گهرجي.ٻئي طرف، عدالت ڊڪي ڀائي جي زال عروب جتوئي جي عبوري ضمانت ۾ به 15 سيپٽمبر تائين واڌ ڪري ڇڏي ۽ اين سي سي آءِ اي کي حڪم ڏنو ته هن عرصي دوران کيس گرفتار نه ڪيو وڃي. عدالت ايجنسي کي ايندڙ ٻڌڻي تي تفصيلي جاچ رپورٽ پيش ڪرڻ جي هدايت پڻ ڪئي. ان دوران، اين سي سي آءِ اي جاچ جو دائرو وڌايو آهي ۽ مشهور يوٽيوبرز ۽ اثر انداز ڪندڙن کي غير قانوني آن لائن واپار ۽ جوا ايپس کي فروغ ڏيڻ جي الزام ۾ طلب ڪيو آهي. رپورٽن موجب، ايجنسي مدثر حسن، محمد انس علي، اقرا ڪنول ۽ محمد حسنين شاهه کي 2 سيپٽمبر 2025 تي لاهور آفيس ۾ پيش ٿيڻ جي هدايت ڪئي آهي. تحقيق ڪندڙن جو چوڻ آهي ته انهن اثر انداز ڪندڙن غير قانوني آن لائن بيٽنگ پليٽ فارمز کي فروغ ڏنو ۽ نوجوانن کي راغب ڪرڻ لاءِ انهن ايپس کي سوشل ميڊيا تي پرڪشش انداز ۾ پيش ڪيو ۽ عوام کي ٺڳيو.
