ڪراچي (اسٽاف رپورٽر) سنڌ جي وڏي وزير سيد مراد علي شاهه جي صدارت هيٺ صوبائي ڪابينا جو اجلاس ٿيو جنهن ۾ 30 موبائيل ميڊيڪل وين سميت 60 ايمبولينسز جي خريداري سميت ٽن سالن تائين ٻارن کي ٿڃ پيارڻ واري قانون کي ضروري قرار ڏيڻ جي منظوري ڏني وئي جڏهن ته JPMC پوسٽن جي گريڊ 9 کان 14 تائين ۽ ان کانپوءِ جي اپ گريڊيشن جي منظوري پڻ ڏني وئي. اجلاس وزيراعليٰ هائوس ۾ ٿيو جنهن ۾ صوبائي وزيرن، صلاحڪارن، خاص مددگارن، چيف سيڪريٽري سهيل راجپوت، اي جي سنڌ حسن اڪبر، وڏي وزير جو پرنسپل سيڪريٽري فياض جتوئي ۽ ٻين شرڪت ڪئي. ايمبولينس جي خريداري: صحت واري وزير ڊاڪٽر عذرا پيچوهو ڪابينا کي بريفنگ ڏيندي چيو ته 30 موبائل ميڊيڪل وين (گاڏيون) ۽ 5 موبائيل ليبارٽرين سميت 60 ايمبولينس خريد ڪرڻ جي ضرورت آهي جنهن لاءِ 2 ارب رپيا گهربل آهن. ڪابينا کي ٻڌايو ويو ته ايمبولينس، ميڊيڪل وين ۽ ليبارٽرين جي خريداري جو مقصد گاؤچر ڊيزز (GDs) کي پرائمري/سيڪنڊري ڪيئر، اليڪٽرانڪ ميڊيڪل سڃاڻپ ۽ علاج، مريضن لاءِ ٽرانسپورٽ، وڏي نقصان سبب هلاڪتن جي ڪيسن ۾ مدد سان ڳنڍڻ آهي. ان ڳالهه جي نشاندهي ڪئي وئي ته موبائيل ميڊيڪل يونٽ انهن جڳهين تي استعمال ڪيا ويندا جتي طبي سهولتون محدود يا اڻپوريون هونديون. موبائيل ليبارٽريون بيمارين جي جانچ، ترت بيماري جي سڃاڻپ ۽ علاج، ماحولياتي جانچ، ۽ فيلڊ اسپتالن ۽ طبي ٽيمن جي مدد لاء استعمال ڪيون وينديون. ايمبولنسن کي ريسڪيو 1122 ۾ شامل ڪيو ويندو. ڪابينا ان مقصد لاءِ درخواست ۽ فنڊز جي منظوري ڏني. بريسٽ فيڊنگ قانون: ڪابينا سنڌ پروٽيڪشن اينڊ پروموشن آف بريسٽ فيڊنگ اينڊ ينگ چائلڊ نيوٽريشن ايڪٽ 2023 تي غور ڪيو ۽ ان جي منظوري ڏني. صحت واري وزير ڊاڪٽر عذرا چيو ته 36 مهينن تائين جي ننڍڙن ٻارن لاءِ محفوظ ۽ مناسب غذائيت کي يقيني بڻائڻ ضروري آهي ته جيئن کير پيارڻ جي حفاظت ۽ سهڪار کي هٿي وٺرائڻ، ٿولهه ۽ غير موذي مرضن کان بچاءُ لاءِ سٺي غذا ڏني وڃي ۽ ان سان گڏ، پروڊڪٽن جي اشتهارن ذريعي ماءُ جي کير جو متبادل ۽ فيڊنگ بوتلن ۽ والوز، نپل شيلڊز، ٽيٽس ۽ پيسيفائرز جي مارڪيٽنگ ڪئي وڃي. ايڪٽ تحت سنڌ حڪومت صحت بابت اسٽينڊنگ ڪميٽي جي صدارت هيٺ 22 رڪني بورڊ قائم ڪندي. بورڊ جي ڪمن ۾ ضابطن جو مسودو تيار ڪرڻ، معياري شين جي سفارش ڪرڻ ۽ حڪومت کي هدايتن ذريعي تجويز ڪرڻ ته جيئن WHO/UNICEF پروٽوڪولن جي مطابق هڪ موثر مانيٽرنگ سسٽم قائم ڪيو وڃي. ڪابينا کي ٻڌايو ويو ته جيڪڏهن ڪوبه واپاري يا واپار ڪندڙ پاران ايڪٽ جي ڪنهن شق جي ڀڃڪڙي ڪندو ته ان کي قانون موجب سزا ڏني ويندي. قانون ۾ سزا خلاف اپيل جي گنجائش هوندي. اسپيشلسٽ ڪيڊر: صحت واري وزير ڊاڪٽر عذرا پيچوهو ڪابينا کي ٻڌايو ته 1975 اسپيشلسٽ ڪيڊر گريڊ 18 جي ڊاڪٽرن جو منظور ٿيل تعداد آهي جنهن جي نتيجي ۾ رڳو 947 ڪم ڪري رهيا آهن ۽ 1028 خالي سيٽون آهن. هن وڌيڪ چيو ته سندس کاتي پاران گريڊ 18 جي اسپيشلسٽ ڪيڊر جي ڊاڪٽرن جي 1096 پوسٽن لاءِ سنڌ پبلڪ سروس ڪميشن کي درخواست موڪلي وئي آهي. SPSC رڳو 68 سيٽن جي سفارش ڪئي ۽ باقي 1028 پوسٽون خالي آهن. ڪابينا کي ٻڌايو ويو ته هن وقت گريڊ 17 جا 2240 ميڊيڪل آفيسر مختلف شعبن ۾ پوسٽ گريجوئيٽ آهن. BS-17 جي انهن ميڊيڪل آفيسرن جون خدمتون اسپيشلسٽ طور استعمال ڪري سگهجن ٿيون ۽ انهن کي اسپيشلسٽ (BS-18) جي پوسٽ تي مقرر ڪري BS-17/18 جي فلوٽنگ پوسٽن طور اسپيشلسٽ جي پوسٽ تي مقرر ڪري سگهجي ٿو. صحت واري وزير چيو ته ميڊيڪل آفيسر گريڊ 17 ۾ پوسٽ گريجوئيٽ ڊگري سان گڏ اسپيشل ڪيڊر گريڊ 18 جي پوسٽن تي ڀرتي ٿي سگهن ٿا ته جيئن صوبي ۾ اسپتالن کي بهتر نموني هلائڻ لاءِ ڊاڪٽرن جي کوٽ کي پورو ڪري سگهجي. ڪابينا ان تجويز جي منظوري ڏيندي صحت کاتي کي هدايت ڪئي ته پوسٽ گريجوئيٽ ڊاڪٽرن کي ترقي ڏني وڃي جن مدو پورو ڪري ورتو آهي ۽ ڀرتي جي ضابطن ۾ ضروري تبديليون ڪيون وڃن ته جيئن انهن کي اسپيشلسٽ ڪيڊر گريڊ 18 ۾ مقرر ڪري سگهجي. ڪابينا ٽيچنگ اسپتالن ۾ نيون اسپيشلٽي ڀرتين جون 455 پوسٽون پيدا ڪرڻ جي پڻ منظوري ڏني جنهن ۾ جسماني اسپيشلسٽ، سرجري اسپيشلسٽ، الائيڊ اسپيشلسٽ ۽ لاڳاپيل ٻيا انساني وسيلن شامل آهن. اهي خالي جايون گريڊ BS-17، 18 ۽ 19 لاءِ آهن. جي پي ايم سي پوسٽن جي اپ گريڊيشن: ڪابينا صحت کاتي جي تجويز جي بحث کانپوءِ منظوري ڏني ۽ اڪائونٽنٽ جي پوسٽن کي گريڊ 9 کان 14 تائين اپ گريڊ ڪري ڪيشيئر، اڪائونٽنٽ، ڪيشئر، ٽيليفون آپريٽر، ريسيپشنسٽ ۽ بورڊ آپريٽر کي گريڊ 7 مان اپ گريڊ ڪيو ويو. گريڊ 16 جي اسٽينوگرافر جي پوسٽ کي گريڊ 17 ۾ اپ گريڊ ڪيو ويو آهي ۽ اسٽينو ٽائپسٽ جي پوسٽ کي گريڊ 14 کان گريڊ 16 ۾ اپ گريڊ ڪيو ويو آهي. ڪابينا سول اسپتال جو نالو مرحوم ڊاڪٽر سڪندر مينڌرو جي خدمتن جي اعتراف ۾ رکيو. هندو ميريج ايڪٽ: اقليتي معاملن بابت وزير گيانچند ايسراڻي ايڪٽ جو مسودو ڪابينا ۾ پيش ڪيو. هن وڌيڪ چيو ته هن ايڪٽ جو مقصد هندن لاءِ شادي جي رجسٽريشن جو باضابطه عمل مهيا ڪرڻ آهي. ڪابينا نشاندهي ڪئي ته عدالت ميريج ايڪٽ لاءِ گائيڊ لائينون ڏنيون آهن تنهنڪري ڪابينا ايڪٽ جي اصولي منظوري باوجود عدالتي هدايتن موجب قانون جوڙڻ لاءِ ڪميٽي جوڙي جنهن ۾ ايڪسائيز اينڊ ٽيڪسيشن وارو وزير مڪيش چاولا، اقليتي معاملن وارو وزير گيان چند اسراڻي، قانوني صلاحڪار مرتضيٰ وهاب ۽ ايڊووڪيٽ جنرل حسن اڪبر شامل آهن. ڪراچي لاءِ وڌيڪ 500 بسون: ٽرانسپورٽ واري وزير شرجيل ميمڻ ڪابينا کي وڊيو لنڪ ذريعي بريفنگ ڏيندي چيو ته سندس کاتو 500 وڌيڪ بسون خريد ڪري پبلڪ بس سروس ۾ اضافو ڪرڻ چاهي ٿو ته جيئن سماج جي غريب طبقي کي سهولت فراهم ڪئي وڃي. ٽرانسپورٽ واري وزير چيو ته شهر جي ٽرانسپورٽ جي ضرورتن کي پورو ڪرڻ لاءِ 13 هزار کان 15 هزار بسون گهربل آهن. هن وڌيڪ چيو ته پيپلز بس سروس جون 1039 بسون روٽ تي هلي رهيون آهن ۽ اڃا تائين 8961 بسن جي کوٽ آهي. ٽيڪسي سروس: ٽرانسپورٽ واري وزير شرجيل ميمڻ ڪراچي لاءِ 200 اليڪٽرڪ ٽيڪسين جي هڪ ٻي تجويز پيش ڪري ڇڏي. انهن مان 50 ٽئڪسيون گلابي ٽئڪسين طور هلنديون. ڪابينا ٽرانسپورٽ کاتي کي بسن ۽ ٽيڪسين جي فزيبلٽي تيار ڪري وڌيڪ ڪارروائي لاءِ پي اينڊ ڊي کاتي کي پيش ڪرڻ جي هدايت ڪئي. ورڪرز ويلفيئر فنڊ ايڪٽ: محنت واري وزير سعيد غني سنڌ ورڪرز ويلفيئر فنڊ ايڪٽ 2014 جي سيڪشن 9 ۾ ترميم جي تجويز ڏني جنهن تحت ورڪرز ويلفيئر بورڊ جي سيڪريٽري /چيف ايگزيڪيوٽو آفيسر جي پوسٽ کي گريڊ 19 يا گريڊ 20 جي فلوٽنگ پوسٽ قرار ڏنو ويو آهي. .
