اسلام آباد(بيورو)اليڪشن ڪميشن پاڪستان تحريڪ انصاف جي منع ڪيل پرڏيهي فنڊنگ ڪيس جو فيصلو ٻڌائيندي چيو آهي ته پي ٽي آءِ منع ٿيل فنڊنگ ورتي. اليڪشن ڪميشن جي متفقه فيصلي ۾ چيو ويو آهي ته ثابت ٿي ويو ته پي ٽي آءِ ممنوع فنڊز ورتو، 13 اڻڄاتل اڪائونٽس سامهون آيا پر پي ٽي آءِ انهن اڪائونٽس بابت ٻڌائڻ ۾ ناڪام وئي، اڪائونٽس لڪائڻ آئين موجب غير قانوني آهي، پي ٽي آءِ 34 پرڏيهين کان فنڊ حاصل ڪيا. متفقه فيصلي ۾ چيو ويو آهي ته عمران خان فارم ون جمع ڪرايو جيڪو غلط هو، اليڪشن ڪميشن تحريڪ انصاف کي شوڪاز نوٽيس پڻ جاري ڪري ڇڏيو آهي.
اهم فيصلا نقطا
• ثابت ٿيو ته پي ٽي آءِ ممنوع فنڊ ورتي آهي
• 13 اڻڄاتل اڪائونٽ سامهون آيا
• آمريڪا، آسٽريليا ۽ يو اي اي مان امداد ملي ٿي
• پي ٽي آءِ انهن اڪائونٽس بابت ٻڌائڻ ۾ ناڪام وئي
• اڪائونٽس لڪائڻ آئين تحت غير قانوني آهي
پوليٽيڪل پارٽيز ايڪٽ جي آرٽيڪل 6 تحت پرڏيهي فنڊنگ تي پابندي: اليڪشن ڪميشن جو فيصلو
• پي ٽي آءِ 34 پرڏيهين، 351 ڪاروبار ۽ ڪمپنين کان فنڊ ورتي
• پي ٽي آءِ عارف نقوي جي ڪمپني ووٽن ڪرڪيٽ کان ممنوع فنڊنگ ورتي
• عارف نقوي جي ڪمپني مان 21 لک 21 هزار 500 آمريڪي ڊالر جي ممنوع فنڊنگ ورتي وئي.
• ووٽن ڪرڪيٽ لميٽيڊ ابراج گروپ جي ڇنڊ ڇاڻ هيٺ ڪم ڪري رهي هئي
• يو اي ايِ جي ڪمپني برسٽول انجنيئرنگ سروسز کان 49 هزار 965 ڊالر ممنوع فنڊ ورتي.
• پوليٽيڪل پارٽيز ايڪٽ جي آرٽيڪل 6 موجب پرڏيهي فنڊنگ منع آهي
عمران خان جو پارٽي اڪائونٽس بابت بيان حلفي ڪوڙو آهي: اليڪشن ڪميشن
• عمران خان فارم ون جمع ڪرايو جيڪو غلط بياني ۽ ڪوڙ تي ٻڌل آهي
• پارٽي اڪائونٽس بابت ڏنل حلف نامو غلط آهي
• خانگي بئنڪ ۾ کليل ٻنهي اڪائونٽن کي عمران خان پي ٽي آءِ جي نالي تي کوليو هو
• هڪ بئنڪ اڪائونٽ ۾ 8 ڪروڙ کان وڌيڪ ۽ ٻئي ۾ 51 هزار ڊالر هئا
• يو اي اِي قانون خيراتي تنظيمن کي عطيو گڏ ڪرڻ کان منع ڪري ٿو
• فنڊ گڏ ڪرڻ جي اجازت جي ضرورت آهي، اجازت حاصل ڪرڻ ۾ ناڪامي يو اي اِي جي قانون جي ڀڃڪڙي آهي
سيڪيورٽي جا سخت انتظام ڪيا ويا
اليڪشن ڪميشن ڏانهن ويندڙ رستا بلاڪ ڪيا ويا آهن ۽ اليڪشن ڪميشن ٻاهران پوليس جي وڏي نفري تعينات ڪئي وئي آهي ته جيئن ڪنهن به ايمرجنسي کي منهن ڏئي سگهجي. دستور هاءِ وي تي رڳو سرينا هوٽل ۽ مارگلا روڊ کي داخلا لاءِ کوليو ويو آهي، جڏهن ته نادرا چوڪ وٽ روڊ اليڪشن ڪميشن وٽ ڪنٽينر لڳائي بلاڪ ڪيو ويو آهي.
