اسلام آباد(بيورو رپورٽ) وفاقي ڪابينا پاڪستان جي پهرين ميوزڪ پاليسي جي منظوري ڏئي ڇڏي.ذريعن موجب وزيراعظم شهباز شريف جي صدارت هيٺ ٿيل اجلاس ۾ ڪابينا ملڪ جي پهرين ميوزڪ پاليسي جي منظوري ڏني.ذريعن موجب نئين ميوزڪ پاليسي ۾ پائريسي، ڪاپي رائيٽ سميت ٻيا مسئلا حل ٿيندا ۽ صارفين ۽ لائسنس جا مسئلا به حل ٿي ويندا، جنهن سان ميوزڪ انڊسٽري کي فروغ ملندو.ذريعن جو چوڻ آهي ته ميوزڪ پاليسي موجب اجارداري جو خاتمو هوندو ۽ ميوزڪ ورڪرن جي بنيادي قانوني حقن جو تحفظ ڪيو ويندو، ميوزڪ اسٽيڪ هولڊرز کي درپيش مسئلن ۽ مطالبن سميت ڪاپي رائيٽ، ميوزڪ پروڊڪشن، گلوڪارن، ليکڪن، گيت ٺاهيندڙن کي درپيش مسئلا ۽ مطالبا پورا ڪيا ويندا. انهن جي قانوني حقن جي تحفظ کي يقيني بڻايو ويندو.ذريعن موجب ميوزڪ پاليسي پاڙيسري ملڪن ۾ رائج قانونن ۽ عالمي معيارن موجب تيار ڪئي وئي آهي، جنهن ۾ پراڻي موسيقي، مقامي ۽ لوڪ موسيقي کي بچائڻ لاءِ خاص اپاءَ ورتا ويا آهن، علائقائي ٻولين ۾ موسيقي پڻ پاليسي جو حصو آهي.ذريعن موجب 1970ع کان وٺي موسيقي جي شعبي ۾ پاليسي سطح تي ڪابه تبديلي نه آئي آهي.ذريعن جو چوڻ آهي ته نئين پاليسي تحت پبلڪ پرفارمنس، پروڊڪشن، ڊسٽري بيوشن، ايڊاپٽيشن، مدو، مڪينيڪل، ڪميونيڪيشن رائٽس کي قانوني ڍانچي ۾ آندو پيو وڃي.
