نيويارڪ(ويب ڊيسسڪ)زوهران ممداڻي، هڪ 34 سالن جو ڊيموڪريٽڪ سوشلسٽ، نيويارڪ شهر جي ميئر جي چونڊ ۾ ڪاميابي حاصل ڪئي، جنهن سان هو هڪ گهٽ سڃاتل اسٽيٽ اسيمبلي ميمبر مان آمريڪا جي سڀ کان نمايان ڊيموڪريٽڪ شخصيتن مان هڪ بڻجي ويو. سي بي ايس (CBS) جي مطابق، ممداڻي 677,615 ووٽ (49.6 سيڪڙو) سان اڳتي رهيو، جڏهن ته نيويارڪ جي اڳوڻي گورنر اينڊريو ڪومو کي 568,488 ووٽ (41.6 سيڪڙو) ۽ ڪرٽس سليوا کي 108,377 ووٽ (7.9 سيڪڙو) مليا. ممداڻي آمريڪا جي سڀ کان وڏي شهر جو پهريون مسلم ميئر بڻجندو. هن ڊيموڪريٽڪ اڳوڻي گورنر اينڊريو ڪومو کي شڪست ڏني، جيڪو پرائمري اليڪشن ۾ ممداڻي کان نامزدگي وڃائڻ کان پوءِ آزاد اميدوار طور مقابلي ۾ هو. هي چونڊ مهم خيالن ۽ نسلن جي وچ ۾ هڪ مقابلو ثابت ٿي، جنهن جا اثر قومي سطح تي ڊيموڪريٽڪ پارٽي لاءِ ٿي سگهن ٿا. صدر ڊونلڊ ٽرمپ چونڊ ۾ آخري لمحي مداخلت ڪندي ممداڻي کي “يهودي دشمن” قرار ڏنو هو. ممداڻي يوگنڊا ۾ هڪ ڀارتي نزاد خاندان ۾ ڄائو ۽ ستن سالن جي عمر ۾ آمريڪا آيو، جتي هو 2018 ۾ شهريت حاصل ڪرڻ بعد آمريڪي شهري بڻيو. ورجينيا ۾، ڊيموڪريٽ ابگيل اسپينبرگر آسانيءَ سان گورنر چونڊ ۾ ڪامياب ٿي، جنهن سان هوءَ ان عهدن تي چونڊجڻ واري پهرين عورت بڻجي وئي، جڏهن ته ڊيموڪريٽ غزاله هاشمي ورجينيا جي ليفٽيننٽ گورنر جي چونڊ ۾ ڪامياب ٿي، آمريڪا جي تاريخ ۾ پهرين مسلمان عورت بڻجي وئي آهي، جيڪا ڪنهن به اسٽيٽ سطح جي عهدن تي چونڊي وئي. نيو جرسي ۾ ڊيموڪريٽ ميڪي شيرل به گورنر جي چونڊ کٽي. اهي چونڊون ڊيموڪريٽڪ پارٽي لاءِ هڪ اهم امتحان ثابت ٿيون، آمريڪا جي مڊ ٽرم اليڪشن 2026 کان صرف هڪ سال اڳ هي نتيجا ڪانگريس تي ڪنٽرول جي فيصلي تي اثر انداز ٿي سگهن ٿا. گذريل سال ڊونلڊ ٽرمپ جي فتح کان پوءِ، ڊيموڪريٽڪ پارٽي واشنگٽن ۾ اقتدار کان ٻاهر آهي ۽ سياسي بحران مان نڪرڻ جو رستو ڳولي رهي آهي. غزاله هاشمي آمريڪا ۾ اسٽيٽ سطح تي چونڊجندڙ پهرين مسلمان عورت بڻجي وئي. هاشمي ورجينيا جي ليفٽيننٽ گورنر جي چونڊ ۾ ريپبلڪن ليکڪ ۽ ريڊيو ميزبان جان ريڊ کي شڪست ڏني. هوءَ 747,773 ووٽن (53.8 سيڪڙو) سان اڳتي رهي جڏهن ته ريڊ کي 659,421 ووٽ (46.4 سيڪڙو) مليا. جون ۾، هاشمي سخت مقابلي واري پرائمري ۾ اڳوڻي رچمنڊ ميئر ليور اسٽوني ۽ اسٽيٽ سينيٽر آرن روس کي شڪست ڏئي ڊيموڪريٽڪ نامزدگي حاصل ڪئي. پارٽي جي پروگريسيو ونگ سان لاڳاپيل، هاشمي کي ڪيليفورنيا جي ڊيموڪريٽ رڪن رو ڪانا سميت ڪيترن اهم اڳواڻن جي حمايت حاصل هئي. هوءَ حيدرآباد، هندستان ۾ ڄائي، جوانيءَ ۾ آمريڪا منتقل ٿي ۽ ايموري يونيورسٽي مان انگريزيءَ ۾ پي ايڇ ڊي حاصل ڪئي. هن ورجينيا جي ڪميونٽي ڪاليجن ۾ ويهه سال انگريزي پڙهائڻ کان پوءِ سياست ۾ قدم رکيو. 2019 ۾ ورجينيا اسٽيٽ سينيٽ ۾ چونڊجي، هاشمي ورجينيا جي قانونسازي ۾ پهرين مسلم عورت بڻي، ۽ هاڻي هوءَ اسٽيٽ سطح جي عهدن تائين پهچي وئي آهي.
هر مزدور جو ٿورائتو آهيان، نيويارڪ ۾ اسلاموفوبيا جي ڪابه گنجائش نه آهي: ظهران ممداني
نيويارڪ جي نئين چونڊيل ميئر ظهران ممداني عوامي خطاب ۾ چيو آهي ته مان نيويارڪ جي هر مزدور جو ٿورو ادا ڪريان ٿو، ٽرمپ ٻڌي وٺي نيويارڪ پناهگيرن جو شهر آهي ۽ رهندو. نيويارڪ ۾ اسلاموفوبيا جي ڪابه گنجائش نه آهي.ظهران ممداني نيويارڪ جي عوام جو ٿورو ادا ڪندي چيو ته اسان نيويارڪ شهر ۾ تاريخ لکي ڇڏي، عوام ثابت ڪري ڇڏيو ته پاور انهن جي هٿن ۾ آهي. نيويارڪ ۾ موروثي سياست جو خاتمو ڪري ڇڏيو. هن چيو ته ڪاميابي حاصل ڪرڻ لاءِ منهنجو ساٿ ڏيڻ جي لاءِ نيويارڪ جي نوجوانن جو ٿورو ادا ڪريان ٿو، گذريل 12 مهينن جي چونڊ مهم تاريخ لکي ڇڏي، اوهان جي ڪري ئي اڄ اسان ڪاميابي ماڻيندڙ پارٽي سان گڏ بيٺل آهيون. نئين چونڊيل ميئر چيو ته نيويارڪ جي شهرين ٻڌايو ته نيويارڪ انهن جو آهي، جمهوريت انهن جي آهي، اسان ليڊرشپ جي نئين دور ۾ داخل ٿي رهيا آهيون. مان پهرين جنوري تي نيويارڪ ميئر جي عهدي جو حلف کڻندس، نيويارڪ جي هر مزدور جو ٿورو ادا ڪريان ٿو. هن چيو ته ٽيڪسي ڊرائيورز، شيفر ۽ نرسز جو به ٿورو، نيويارڪ کي اهڙو ٺاهينداسين جتي ورڪنگ ڪلاس آساني سان رهجي سگهن، سڀ اسان سان گڏ بيٺل آهن، هڪ هزار کان وڌيڪ رضاڪارن جي چونڊ مهم ۾ حصو وٺڻ تي سندن ٿورو ادا ڪريان ٿو. ممداني چيو ته اڄ اسان انهي شهر ۾ ساهه کڻي رهيا آهيون جنهن جو نئون جنم ٿي رهيو آهي. اڄ خوف جي شڪست ۽ اميد جي سوڀ ٿي، اسان خوفزده ڪندڙن کي جواب ڏئي ڇڏيو، نيويارڪ اڄ تبديلي لاءِ ووٽ ڏنو، صرف انهي ڳالهه جو ڏک آهي ته اڄوڪو ڏينهن ڏسڻ لاءِ تمام گهڻو وقت لڳو.عوام جي پرجوش نعرن جي وچ ۾ ظهران ممداني چيو ته اسان سان جيڪو ڪجهه ٿيو اهو سياست نه، سياست هاڻ ٿيندي، عوام کي ورهائڻ جي اجازت نه ڏينداسين، نيويارڪ ۾ اسلاموفوبيا جي ڪابه گنجائش نه آهي، عوام لاءِ وڙهندس، ڇو ته مان انهن مان ئي آهيان.هن چيو ته اڄوڪي چونڊ جي نتيجن ثابت ڪري ڇڏيو آهي ته اميد اڃان زنده آهي، سياسي اونداهي ۾ نيويارڪ هڪ روشني بڻجي اڀريو، مون کي خبر آهي ڊونلڊ ٽرمپ منهنجي تقرير ڏسي رهيو آهيان، ٽرمپ ٻڌي وٺي نيويارڪ پناهگيرن جو شهر آهي ۽ رهندو. هن چيو ته مان مسلمان آهيان، ڊيمو ڪريٽڪ سوشلسٽ آهيان، نيويارڪ هاڻ اهو شهر ناهي رهيو جتي اوهان اسلاموفوبيا جي نالي تي چونڊ کٽيو، ڪوبه ٽرمپ کي شڪست ڏئي سگهي ٿو ته اهو نيويارڪ شهر آهي.نيويارڪ جي نئين چونڊيل ميئر چيو ته نيويارڪ کي پناهگيرن مضبوط ڪيو آهي، پهرين جنوري کان اسان هڪ اهڙي شهري حڪومت ٺاهينداسين جيڪا سڀني لاءِ فائديمند هوندي. مزدور حقن لاءِ يونين سان گڏ بيٺل هوندا. سيڪيورٽي ۽ انصاف سڀني کي فراهم ڪيو ويندو.
اسپينبرگر پهرين عورت گورنر بڻجي
ڊيموڪريٽ اسپينبرگر، ريپبلڪن ارل-سيئرز کي شڪست ڏئي، ورجينيا جي پهرين عورت گورنر بڻجي وئي، جنهن سان پارٽي کي وڏو سياسي سهارو مليو آهي. 47 سالن جي اسپينبرگر پنهنجي مهم دوران معيشت، عوامي تحفظ ۽ عورتن جي حقِ حمل بابت قانون تي ڌيان ڏنو. هن پنهنجي مخالف کي ٽرمپ جي وفاداري ۽ قدامت پسند نظرين تي تنقيد جو نشانو بڻايو. هن پنهنجي فتح واري تقرير ۾ چيو: “اسان دنيا کي ٻڌايو ته 2025 ۾ ورجينيا تڪرار بدران عمليت پسند قيادت چونڊي.” “توهان سڀني اهڙي قيادت چونڊي آهي جيڪا خرچ گهٽائڻ، برادريءَ کي محفوظ رکڻ ۽ هر ورجينين لاءِ معيشت مضبوط ڪرڻ تي ڌيان ڏيندي.” ان کان الڳ، ڊيموڪريٽ ميڪي شيرل نيو جرسي جي گورنر چونڊ ۾ ڪامياب ٿي. هوءَ اڳوڻي نيوي پائلٽ ۽ آمريڪي نمائنده آهي، جنهن ريپبلڪن جيڪ چيٽاريلي کي شڪست ڏئي، ڊيموڪريٽ گورنر فل مرفي جي جاءِ ورتي. هي پهريون ڀيرو آهي 1960ع کان پوءِ، جو نيو جرسي ۾ ٽن دورن تائين هڪ ئي پارٽي جا گورنر چونڊيا ويا آهن.
