اسلام آباد(بيورو)يوٽيلٽي اسٽورن تي 20 ڪلو اٽي جو اگهه 950 کان 800 رپيا ۽ کنڊ جو اگهه 85 رپيا في ڪلو مان گهٽائي 70 رپيا في ڪلو ڪرڻ جو فيصلو ڪيو ويو. اسلام آباد ۾ ناڻي واري وزير مفتاح اسماعيل جي صدارت هيٺ اقتصادي رابطا ڪميٽي (اي سي سي) جو اجلاس ٿيو، جنهن ۾ سبزي جي گهي تي 180 رپيا في ڪلو سبسڊي ڏيڻ جي به منظوري ڏني وئي جڏهن ته ملڪي گهرج موجب 3 ملين ميٽرڪ ٽن ڪڻڪ درآمد ڪرڻ جي اجازت ڏني وئي.اي سي سي پاران جاري ڪيل پڌرائي موجب اٽي ۽ کنڊ جي قيمتن تي نظرثاني جي سمري منظور ڪئي وئي. اٽي جي 20 ڪلو ٿيلهي جو اگهه 950 مان گهٽائي 800 رپيا ۽ کنڊ جو اگهه 85 رپيا 70 رپيا في ڪلو ڪرڻ جي منظوري ڏني وئي.بيان موجب وزيراعظم جي رليف پيڪيج ۾ مئي، جون تائين واڌ جي منظوري ڏني وئي آهي، رمضان رليف پيڪيج تحت يوٽيلٽي اسٽورن تي ضروري شين جي وڪرو جي به اجازت ڏني وئي آهي.
