اسلام آباد(رپورٽ اياز مهر)وزيراعظم شهباز شريف خميس ڏينهن چيو ته يومِ تڪبير پاڪستان جي تاريخ ۾ هڪ فيصلائتو لمحو آهي، جڏهن قوم ايٽمي طاقت بڻجي اڻ ٽٽ عزم، اتحاد ۽ همت جو مظاهرو ڪندي خطي ۾ اسٽريٽجڪ توازن بحال ڪيو۔
يومِ تڪبير 28 مئي 1998ع جي ان تاريخي ڏينهن جي نشاندهي ڪري ٿو، جڏهن پاڪستان بلوچستان جي چاغي جي جبلن ۾ ڪامياب ايٽمي تجربا ڪري ايٽمي طاقتن جي صف ۾ شامل ٿيو۔
پنهنجي پيغام ۾ وزيراعظم چيو ته پاڪستان 28 مئي 1998ع تي ڀارت جي ايٽمي ڌماڪن جي جواب ۾ ڪامياب ايٽمي تجربا ڪيا، جنهن سان دنيا کي واضح پيغام ڏنو ويو ته ملڪ پنهنجي دفاع ۽ خودمختياري تي ڪڏهن به سمجهوتو نه ڪندو۔
هن چيو ته اهو ڏينهن ان ڳالهه جو ثبوت آهي ته پاڪستان جو دفاع مضبوط ۽ قابل هٿن ۾ آهي۔ هن پاڪستان جي ايٽمي پروگرام ۾ حصو وٺندڙ سمورن ماڻهن کي خراجِ تحسين پيش ڪيو، جن ۾ اڳوڻا وزيراعظم ذوالفقار علي ڀٽو ۽ نواز شريف به شامل آهن۔
وزيراعظم ڊاڪٽر عبدالقادر خان، ڊاڪٽر ثمر مبارڪ مند سميت انهن سائنسدانن، انجنيئرن، ماهرن، فوجي اهلڪارن ۽ مزدورن جي خدمتن کي به ساراهيو جن پاڪستان جي دفاع کي ناقابلِ تسخير بڻائڻ ۾ تاريخي ڪردار ادا ڪيو۔
هن چيو ته ڀارت جارحانه ۽ توسيع پسندانه ارادن تحت ايٽمي تجربا ڪيا، جڏهنتہ پاڪستان حڪمت ۽ عزم سان جواب ڏئي دشمن جا ارادا ناڪام ڪيا۔ هن چيو ته عالمي دٻاءُ، اقتصادي ڌمڪين ۽ مالي لالچن باوجود ان وقت جي وزيراعظم نواز شريف ملڪ جي آزادي ۽ سلامتي تي سمجهوتو نه ڪيو۔
وزيراعظم چيو ته يومِ تڪبير قومي وقار، قرباني، اتحاد ۽ وطن جي دفاع لاءِ اٽل عزم جي علامت آهي۔ هن چيو ته پاڪستان جي ايٽمي صلاحيت ۽ هٿياربند فوجن جي تياري دشمن جي جارحيت خلاف هڪ فيصلائتو رنڊڪ آهي۔
ڀارت سان تازن تڪرارن جو حوالو ڏيندي وزيراعظم چيو ته پاڪستان “معرڪهءِ حق” دوران جارحيت جو ڀرپور جواب ڏئي پنهنجو عزم ڏيکاريو۔ هن چيو ته ڀارت مقبوضه ڪشمير جي پهلگام ۾ ڪوڙو فالس فليگ آپريشن ڪيو ۽ ان بهاني پاڪستاني شهري ۽ مسجدن کي نشانو بڻايو۔ هن چيو ته پاڪستان جون هٿياربند فوجون ۽ قوم “بنيان مرصوص” وانگر متحد ٿي دشمن جا منصوبا ناڪام بڻايا ۽ ان جي فوجي برتري جي غلط تصور کي چئلينج ڪيو۔
وزيراعظم آرمي چيف ۽ چيئرمين جوائنٽ چيفس آف اسٽاف ڪميٽي جنرل عاصم منير جي قيادت جي به تعريف ڪئي، ۽ چيو ته ان جي قيادت هيٺ فوج اعليٰ پيشيوارانه ڪارڪردگي ڏيکاري۔ هن هوائي فوج جي سربراهه ظهير احمد بابر ۽ بحري فوج جي سربراهه نويد اشرف جي ڪارڪردگي کي به ساراهيو۔
هن چيو ته پاڪستان جو ڪنهن به ملڪ خلاف جارحانه ارادو ناهي، پر پنهنجي دفاع جو مڪمل حق رکي ٿو۔ هن خبردار ڪيو ته سڌي مقابلي ۾ ناڪامي کان پوءِ دشمن هاڻي پراڪسي گروپن جهڙوڪ “فتنه الخوارج” ۽ “فتنه الهندستان” ذريعي پاڪستان جي سلامتي کي نقصان پهچائڻ جي ڪوشش ڪري رهيو آهي۔
هن چيو ته پاڪستان انهن سمورن خطرن ۽ انهن جي سهولتڪارن کي آپريشنز ذريعي ختم ڪرڻ لاءِ پرعزم آهي، جن ۾ “آپريشن بنيان مرصوص” ۽ “آپريشن غضب الحق” شامل آهن۔
وزيراعظم ٻيهر چيو ته هٿياربند فوجون مڪمل طور تي تيار ۽ جديد صلاحيتن سان ليس آهن ته جيئن وطن جي هر انچ جو دفاع ڪري سگهن۔ هن قوم کي اتحاد، استحڪام، امن ۽ ترقي لاءِ گڏيل عزم جي تجديد ڪرڻ جي اپيل ڪئي۔
“پاڪستان جي تاريخ جو فيصلائتو لمحو”
الڳ پيغام ۾ صدر آصف علي زرداري چيو ته يومِ تڪبير ملڪ جي تاريخ ۾ هڪ فيصلائتو لمحو آهي، ۽ 28 مئي 1998ع کي اهڙو ڏينهن قرار ڏنو جڏهن پاڪستان چاغي ۾ ڪامياب ايٽمي تجربن ذريعي اسٽريٽجڪ خودمختياري حاصل ڪئي۔
هن چيو ته اهي تجربا پاڪستان کي دنيا جي ستين ايٽمي طاقت بڻائڻ جو سبب بڻيا ۽ ملڪ جي دفاع کي ناقابلِ تسخير بڻايو۔ هن چيو ته پاڪستان جو ايٽمي پروگرام ڀارت جي ايٽمي عزائم جي جواب ۾ شروع ڪيو ويو۔
صدر چيو ته پاڪستان مسلسل عالمي دٻاءُ، پابندين ۽ چئلينجن باوجود پنهنجي خودمختياري ۽ قومي سلامتي جي تحفظ تي قائم رهيو۔
هن سائنسدانن، انجنيئرن ۽ هٿياربند فوجن کي خراجِ تحسين پيش ڪيو ۽ چيو ته انهن جي محنت پاڪستان کي تاريخي ڪاميابي ڏيارڻ ۾ مدد ڪئي۔
صدر چيو ته 1998ع ۾ ڀارت جا ايٽمي تجربا پاڪستان جي سلامتي لاءِ وڏو چئلينج هئا، جنهن جي نتيجي ۾ پاڪستان پنهنجي قومي مفادن مطابق فيصلائتو قدم کنيو۔
هن چيو ته هي ڪاميابي قومي اتحاد ۽ گڏيل عزم جي علامت آهي، ۽ پاڪستان جي ايٽمي صلاحيت ملڪ جو اهم ترين اثاثو آهي۔
هن جديد جنگي ٽيڪنالاجي، سائبر صلاحيتن ۽ ڊرون سميت نئين خطرن جو به ذڪر ڪيو ۽ چيو ته پاڪستان جي فوج انهن شعبن ۾ مڪمل طور تي تيار آهي۔
صدر چيو ته پاڪستان هڪ امن پسند ملڪ آهي پر گڏيل قومن جي چارٽر تحت پنهنجي دفاع جو حق رکي ٿو۔
هٿياربند فوجن جو عزم
آءِ ايس پي آر موجب آرمي چيف ۽ بحري ۽ هوائي فوج جي سربراهن چيو ته يومِ تڪبير ان تاريخي ڪاميابي جي ياد ڏياريندو آهي جڏهن پاڪستان ايٽمي طاقت بڻجي علائقائي توازن بحال ڪيو۔
هنن چيو ته هي ڏينهن قومي اتحاد، عزم ۽ خودمختياري جي تحفظ جي علامت آهي۔
بيان ۾ چيو ويو ته هي ڪاميابي سائنسدانن، انجنيئرن، فوجي اهلڪارن ۽ پاڪستاني عوام جي قربانين جو نتيجو آهي۔
فوجن ٻيهر عزم ظاهر ڪيو ته وطن جي هر خطري کان حفاظت ڪئي ويندي ۽ ملڪ جي سلامتي، استحڪام ۽ ترقي لاءِ ڪوششون جاري رهنديون۔
بيان جي آخر ۾ چيو ويو ته پاڪستاني قوم الله تعاليٰ جي حضور عاجزي سان اتحاد، بيداري، عزم ۽ ترقي لاءِ پنهنجو عزم ٻيهر ورجائي ٿي۔
