راولپنڊي (ويب ڊيسڪ) نيب پنجاب جي صوبائي وزير محسن لغاري کي به کنڊ اسڪينڊل ۾ طلب ڪري ورتو آهي.رپورٽ موجب نيب کنڊ اسڪينڊل جي جاچ مني لانڊرنگ ايڪٽ 2010 جي تحت ڪري رهيو آهي ۽ کنڊ اسڪينڊل ۾ وڏي حڪومتي شخصيتن جي طلبي جو سلسلو جاري آهي ۽ هن ڀيري نيب راولپنڊي پنجاب جي صوبائي وزير محسن لغاري کي طلب ڪري ورتو آهي. نيب ذريعن موجب محسن لغاري کي 4 مئي تي راولپنڊي آفيس ۾ طلب ڪيو ويو آهي. جتي هن کان نيب جي گڏيل ٽيم جاچ ڪندي.ان حوالي سان محسن لغاري کي 2018 کان 2019 ۾ شوگر تي ڏنل سبسڊي ۽ ايڪسپورٽ جو اجازت نامو ڏيڻ جو رڪارڊ به طلب ڪيو ويو آهي. نيب گذريل هفتي ڪين ڪمشنر ۽ چيف سيڪريٽري آفيس جو دورو ڪري رڪارڊ حاصل ڪيو هو.واضح رهي ته گذريل ڏينهن نيب راولپنڊي پنجاب جي صنعت ۽ واپار واري وزير ميان اسلم اقبال کي 4 مئي تي طلب ڪرڻ جو نوٽيس جاري ڪيو هو جڏهن ته اڳوڻي صوبائي وزير خوراڪ سميع الله چوڌري کي به نيب راولپنڊي آفيس ۾ طلب ڪيو ويو آهي.
