ڪراچي (اسٽاف رپورٽر) سنڌ جي تعليم واري وزير سعيد غني اعلان ڪيو آهي ته نائين ۽ ڏهين جي امتحانن جا ايڊمت ڪارڊ شاگردن ۾ ورهائڻ لاءِ واسطيدار اسڪولن جون آفيسز کولڻ جو فيصلو ڪيو ويو آهي. ٽوئٽر تي جاري پيغام ۾ هن ٻڌايو آهي ته تعليم کاتي جي اسٽيئرنگ ڪميٽي جي اجلاس ۾ فيصلو ڪيو ويو ته نائين ۽ ڏهين جا امتحان وقت تي يعني 16 مارچ تي منعقد ٿيندا ۽ ان بابت واسطيدار اسڪولن جون آفيسون کولي شاگردن کي ايڊمت ڪارڊ ڏنا ويندا. جڏهن ته باقي اسڪول 13 مارچ تائين ڪورونا وائرس سبب بند رهندا. هن اڳ ۾ اعلان ڪيو هو ته وڌيڪ موڪل نٿا ڪري سگهون ۽ سڄي سنڌ ۾ تعليمي ادارا 16 مارچ کان کوليا ويندا. ياد رهي ته دنيا جي 13 ملڪن ۾ ڪورونا وائرس سبب تعليمي ادارا بند ڪيا ويا هئا ۽ 29 ڪروڙ شاگردن جي تعليم متاثر ٿي هئي. 26 فيبروري تي ڪراچي ۾ ڪورونا وائرس جو پهريون ڪيس سامهون اچڻ بعد ٻن ڏينهن لاءِ حڪومت تعليمي ادارا بند ڪيا هئا ۽ بعد ۾ 13 مارچ تائين بندش ۾ واڌ ڪئي وئي هئي. پاڪستان ۾ هن وقت تائين وائرس جا 6 ڪيس رپورٽ ٿيا آهن جن مان پهريون مريض صحتمند ٿي اسپتال مان گهر پهچي ويو آهي. دنيا جي 80 ملڪن ۾ وائرس ڦهلجي چڪو آهي ۽ هڪ لک کان مٿي ماڻهو وائرس جو شڪار آهن. سڀ کان وڌيڪ موت چين ۾ ۽ ٻئي نمبر تي ايران ۾ رپورٽ ٿيا آهن.
