اسلام آباد: (بيورو رپورٽ) اسلام آباد هاءِ ڪورٽ ۾ عافيه صديقي جي آزادي ۽ وطن واپسي بابت ڪيس 29 آڪٽوبر تي وڏي بينچ ۾ ٻڌڻي لاءِ مقرر ڪيو ويو آهي، رجسٽرار آفيس ڪيس جي ٻڌڻي لاءِ ڪاز لسٽ جاري ڪئي آهي. اسلام آباد هاءِ ڪورٽ ڪيس جي ٻڌڻي لاءِ چار رڪني وڏي بينچ ٺاهي آهي، جسٽس ارباب محمد طاهر چار رڪني وڏي بينچ جي سربراهي ڪندا، جسٽس خادم حسين سومرو، جسٽس اعظم خان ۽ جسٽس راجا انعام امين منهاس بينچ ۾ شامل ٿيندا، ان کان اڳ، بينچ جي هڪ ميمبر جي غير موجودگي سبب پوئين ٻڌڻي منسوخ ڪئي وئي هئي. پهرين سيپٽمبر تي، جسٽس انعام امين منهاس وڏي بينچ لاءِ فائل چيف جسٽس ڏانهن موڪلي هئي. ان کان اڳ، هي ڪيس جسٽس سردار اعجاز اسحاق خان جي عدالت ۾ ٻڌڻي هيٺ هو، جسٽس سردار اعجاز اسحاق گذريل ٻڌڻي تي وزيراعظم ۽ ڪابينا ميمبرن کي توهين عدالت جا نوٽيس جاري ڪيا هئا. جسٽس سردار اعجاز اسحاق جي ٽيڪس ڪيسن لاءِ اسپيشل ڊويزن بينچ جو حصو بڻجڻ کان پوءِ، سنگل بينچ جا ڪيس منتقل ڪيا ويا.
