ڪراچي( ويب ڊيسڪ) سنڌ ۾ آدم ڳڻپ دوران نرالي ۽ مشڪوڪ انداز اختيار ڪيو ويو آهي. عملو مڪمل تباهه ٿيل گهرن آڏو بيٺل وڻن ۽ لوڙهن ٻاهران رکيل پٿرن تي نمبر هڻي رهيو آهي. سنڌ جي ساڃاهه وندن اڳ ۾ ئي اعتراض ڪيو هو ته گهرن جي تعمير تائين آدم شماري ملتوي ڪئي وڃي پر ان تي ڪنهن ڌيان نه ڌريو. نام نهاد ڊجيٽل آدمشماري دوران اهڙي مشڪوڪ انداز ۾ ٿيندڙ ڳڻپ ۾ وڏي پيماني تي گڙ ٻڙ ٿي سگهي ٿي ۽ سنڌ واسي ڳڻپ کان رهجي ويندا.
ٻوڏ سٽيل علائقن ۾ گھر ڳڻپ ۾ نمبر هڻڻ لاءِ در ۽ ڀتيون ناهن بچيل، نمبر هينءَ پيا لڳن. ڪن گهرن جو ته نالو نشان ئي ناهي اتي نمبر ڇا تي لکندا. اسان ان لاءِ رڙيون پئي ڪيون ته لکين گهر ڊٿل آهن، هينئر گهر ڳڻپ نه ڪرايو، ماڻهن جي اجھا ٺهڻ جو انتظار ڪيو. هن ڳڻپ ۾ لکين ماڻهو رهجي سگهجن ٿا pic.twitter.com/i2ypxD68ry
— Naseer Memon (@nmemon2004) March 7, 2023
هڪ پاسي اهو انداز آهي ته ٻئي پاسي ڳڻپ ڪندڙ عملي کي ٽريول الائونس نٿو ڏنو وڃي جنهن سبب سنڌ جي مختلف شهرن ۾ عملو ڪم نه پيو ڪري ان سبب به ماڻهو ڳڻپ کان رهجي ويندا. ياد رهي ته سرڪاري انگن اکرن موجب برساتي ٻوڏ ۾ 17 لک کان مٿي گهر ڪُلي ۽ جُزوي طور تباه ٿيا هئا.