پکو (عبدالوحيد ميئو) اتر جو واءُ لڳڻ ۽ سياري جي ٿڌ شروع ٿيڻ شرط ئي پکو شھر جي بازارن ۾ مڇي جا اڏا لڳي ويا آھن جتي خريدارن جي سڄو ڏينھن رش لڳل رھي ٿي ۽ روزانو سوين مڻ مڇي وڪرو ٿي رھي آھي. سردي کان بچاءّ لاءِ گرم خوراڪ طور شھري مڇي وافر مقدار ۾ واپرائڻ لڳا آھن. مڇي جي وڌيڪ کپت سبب شھر ۾ اڏن کانسواءِ مڇي وڪرو ڪندڙ آسپاس جي علائقن ۾ وڃي به مڇي وڪرو ڪري رھيا آھن جڏھن ته مڇي جي اڏن تي سڀ کان وڌيڪ وڪرو ٿيندڙ مڇي ڪرڙو ۽ موراخو قسم آھن جن کي ماڻھو وڌيڪ خريد ڪري رھيا آھن اھڙي طرح مڇي جي اگھن ۾ پڻ واڌ اچي وئي آھي.
فش فارم وارن به موقعي جو فائدو وٺندي مڇي جا اگھ 300 کان 350 روپيه ڪري چوٽ چاڙھي ڇڏيا آھن جنھن سان مھانگائي ۾ پڻ اضافو اچي ويو آھي. ان حوالي سان پکو واسين شھرين زاھد خشڪ، طارق علي، خالد حسين، منير، جميل ٻوڪ، اسد پنھور، حبيب الله عطاري، ضمير حسين مغيري ۽ ٻين ٻڌايو ته مڇي واپرائڻ سردي جي موسم ۾ مفيد آھي جيڪا سردي کي گھٽ ڪرڻ ۾ مدد ڏئي ٿي ان سان گڏ مڇي ۾ جسماني وٽامن پڻ آھي جيڪا مريض ۽ ڪمزور ماڻھن کي فائدو رسائي ٿي. مڇي ۾ سڀ کان وڌيڪ لذت ڪرڙو ۽ موراخو مڇي ۾ آھي. ان موقعي تي مڇي کپائيندڙ دڪاندارن جو چوڻ هو ته سرڪار ٻيون شيون به مھانگيون ڪيون اتي مڇي به مھانگي ضرور ٿي آھي پر ٻين عام واھپي جي شين جي ڀيٽ ۾ مڇي جا اگھ مناسب مقدار ۾ آھن باقي خريدار ته ھر وقت مھانگائي جون دانھون ڪندا آھن اسان جي به روزي مڇي وڪرو تي آھي جنھن مان ڪجھ منافعو ڪمائي ٻچڙن جو پيٽ پاليون ٿا.
