اسلام آباد: (بيورو رپورٽ) وزيراعظم محمد شهباز شريف بهادر شهري شهيد لياقت کي خراج تحسين پيش ڪيو، جنهن پنجاب ۽ خيبر پختونخواه جي بين الصوبائي علائقي ڪوهاٽ جي جند ۽ خوشحال ڳڙهه پل جي ويجهو هڪ وڏي دهشتگرد حملي کي ناڪام بڻايو.وزيراعظم پنهنجي بيان ۾ چيو ته هڪ ذميوار شهري جي حيثيت سان، لياقت شڪي کي روڪيو ۽ ان کان سندس سڃاڻپ پڇي، جنهن تي دهشتگرد پاڻ کي ڌماڪي سان اڏائي ڇڏيو. لياقت به هن واقعي ۾ پنهنجي جان وڃائي ويٺو.وزيراعظم چيو ته شهيد لياقت جي بروقت بهادري هڪ وڏي جاني نقصان کي روڪيو ۽ سندس لازوال قرباني کي هميشه ياد رکيو ويندو. شهيد لياقت غير معمولي جرئت، فرض شناسي ۽ حب الوطني جي اعليٰ مثال قائم ڪئي.وزيراعظم شهباز شريف چيو آهي ته اهڙا بهادر ۽ بي خوف شهري دهشتگردي خلاف قومي عزم جي سچي علامت آهن ۽ شهيد لياقت جي قرباني قوم جي هر فرد لاءِ روشني جو مينار آهي. قوم شهيد لياقت جي قرباني کي ڪڏهن به نه وساريندي ۽ اهڙا بهادر شهري پوري قوم جو اثاثو آهن.هن ان عزم کي ورجايو ته پوري قوم دهشتگردي جي لعنت خلاف پنهنجي سيڪيورٽي فورسز ۽ قانون لاڳو ڪندڙ ادارن سان گڏ بيٺي آهي. پاڪستان جي بهادر عوام هميشه دشمن جي بڇڙن ارادن کي ناڪام بڻايو آهي ۽ مستقبل ۾ قومي اتحاد ۽ ايڪتا ذريعي دهشتگردي کي شڪست ڏني ويندي.وزيراعظم شهيد لياقت جي درجن جي بلندي ۽ سندس خاندان جي صبر جي دعا پڻ ڪئي.
