اسلام آباد(بيورو رپورٽ)پاڪستان طرفان ايران تي ٿيل اسرائيلي حملي جي سخت مذمت ڪئي وئي آهي. پرڏيهي آفيس جي ترجمان جو چوڻ آهي ته اسرائيلي حملو، ايران جي خودمختاري ۽ علاقائي سلامتي جي ڀڃڪڙي آهي. پرڏيهي آفيس جي ترجمان موجب، اسرائيل جو ايران تي حملو عالمي قانون ۽ گڏيل قومن جي چارٽر جي به سنگين ڀڃڪڙي آهي، اهڙن حملن سان علاقائي امن ۽ استحڪام کي نقصان پهچندو آهي، حملن سان خطي ۾ عدم استحڪام خطرناڪ حد تائين وڌي ويندو آهي. پرڏيهي آفيس جي ترجمان جو چوڻ آهي ته اسرائيل تڪرار جي وڌڻ ۽ پکيڙجڻ جو ذميوار آهي، گڏيل قومن جي سلامتي ڪائونسل عالمي امن ۽ استحڪام لاءِ پنهنجو ڪردار ادا ڪري.پرڏيهي آفيس جي ترجمان موجب، پاڪستان گڏيل قومن کان مطالبو ڪيو آهي ته هو خطي ۾ اسرائيل جي لاپرواهي ۽ مجرماڻي ورتاءُ جي خاتمي لاءِ فوري قدم کڻي، عالمي برادري خطي جي امن ۽ سلامتي لاءِ پنهنجو ڪردار ادا ڪري.
