ڪراچي:(اسٽاف رپورٽر) سنڌ هاءِ ڪورٽ (SHC) خميس ڏينهن چيو آهي ته جيڪڏهن سنڌ مان انڊس ريور سسٽم اٿارٽي (اِرسا) لاءِ وفاقي ميمبر جي مقرري 4 هفتن اندر نه ڪئي وئي ته پوءِ موجوده مقرري پاڻمرادو معطل سمجهي ويندي. هاءِ ڪورٽ کي هڪ وفاقي قانوني آفيسر آگاهه ڪيو ته اِرسا لاءِ وفاقي ميمبر سنڌ مان مقرر ڪرڻ جو معاملو غور هيٺ آهي، پر بجيٽ جي مسئلن سبب ان تي عمل نه ٿي سگهيو آهي. سنڌ جي هڪ آبادگار، اِرسا جي وفاقي ميمبر اسجد امتياز علي جي پنجاب مان مقرري خلاف SHC ۾ درخواست داخل ڪئي هئي، جنهن ۾ هن موقف اختيار ڪيو ته اها مقرري پاليسي فيصلي ۽ سنڌ هاءِ ڪورٽ جي اڳئين فيصلي جي واضح خلاف ورزي آهي. ان کان اڳ، سنڌ هاءِ ڪورٽ 2017ع ۾ جاري ڪيل پنهنجي حڪم جي روشني ۾ وفاقي ميمبر کي سنڌ مان مقرر ڪرڻ لاءِ لاڳاپيل ڌرين کي هدايتون جاري ڪيون هيون. جڏهن هي معاملو خميس ڏينهن جسٽس محمد اقبال ڪلهوڙي جي سربراهيءَ ۾ ٻن ججن واري بينچ اڳيان ٻڌڻي لاءِ پيش ٿيو، ته درخواست گذار جي وڪيل، بئرسٽر ضمير گهمرو، عدالت کي آگاهه ڪيو ته SHC جي بار بار هدايتن جي باوجود وفاقي ميمبر سنڌ مان مقرر نه ڪيو ويو آهي، ۽ عدالت جي حڪمن تي عمل نه پيو ڪيو وڃي. بينچ پنهنجي حڪم ۾ ذڪر ڪيو ته ايڊيشنل اٽارني جنرل منور اقبال اسلام آباد مان اچي عدالت ۾ پيش ٿيو ۽ وڌيڪ مهلت جي درخواست ڪئي، سندن چوڻ موجب ته معاملو زير غور آهي پر بجيٽ سبب حل نه ٿي سگهيو آهي. “هن چار هفتن جو وقت گهريو آهي ته جيئن معاملو حل ڪري سگهجي، هن قبول ڪيو ته جيڪڏهن چار هفتن اندر فيصلو نه ڪيو ويو ۽ 12-05-2017ع جي فيصلن جي روشني ۾ سنڌ مان وفاقي ميمبر مقرر نه ڪيو ويو ته پوءِ موجوده نوٽيفڪيشن، جنهن تحت جوابدار نمبر 5 [اسجد امتياز علي] کي وفاقي ميمبر مقرر ڪيو ويو آهي، پاڻمرادو معطل ٿي ويندو”، حڪم ۾ چٽو چيو ويو. ان کان اڳ، سنڌ جي صوبائي اختيارين پڻ SHC کي آگاهه ڪيو هو ته سنڌ طرفان ريٽائرڊ چيف انجنيئر شفقت حسين وڌو کي اِرسا لاءِ وفاقي ميمبر طور 3 سال لاءِ مقرر ڪرڻ جي سفارش ڪئي وئي آهي.
