اسلام آباد(بيورو رپورٽ)وزيراعظم شهباز شريف آڊيو ليڪس واري معاملي تي گهرو وزير راڻا ثناءُ الله جي سربراهي ۾ 12 رڪني اعليٰ اختياري ڪميٽي قائم ڪري ڇڏي.اعليٰ اختياري ڪميٽي جوڙڻ جو نوٽيفڪيشن جاري ڪيو ويو آهي، جنهن موجب وفاقي وزيرن ۾ شيري رحمان، اعظم نذير تارڙ، اسد محمود ۽ امين الحق شامل آهن.نوٽيفڪيشن ۾ چيو ويو آهي ته انٽر سروسز انٽيليجنس (آءِ ايس آءِ) جو ڊائريڪٽر جنرل (ڊي جي) ۽ ڊائريڪٽر جنرل (ڊي جي) انٽيليجنس بيورو (آءِ بي) به ڪميٽي ۾ شامل آهن، جڏهن ته ڊي جي آءِ ايس آءِ به ڪميٽي ۾ نمائندگي ڪري سگهي ٿو، ان جو نامزد نمائندو به ڪري سگهي ٿو نوٽيفڪيشن موجب ڪميٽي وزيراعظم هائوس ۾ سائبر سيڪيورٽي جي ڀڃڪڙي جي جاچ ڪندي ۽ ڪميٽي 7 ڏينهن اندر جاچ مڪمل ڪندي.نوٽيفڪيشن ۾ چيو ويو آهي ته ڪميٽي وزيراعظم هائوس ۾ موجود سيڪيورٽي پروٽوڪول جو جائزو وٺندي ۽ وزيراعظم هائوس ۾ فول پروف سيڪيورٽي ۽ ڊجيٽل ايڪو سسٽم کي يقيني بڻائيندي، ان کان علاوه ڪميٽي وزيراعظم هائوس ۾ اي سيفٽي سسٽم جو جائزو وٺندي.نوٽيفڪيشن ۾ چيو ويو آهي ته ڪميٽي وزيراعظم هائوس ۾ ڊيٽا محفوظ ڪرڻ لاءِ سفارشون پڻ ڏيندي.
