ڪراچي (مانيٽرنگ ڊيسڪ) سنڌ جي وڏي وزير سيد مراد علي شاهه چيو آهي ته آئيڊياز 2024 نه رڳو پاڪستان جي عالمي ڀائيوارن سان اسٽريٽجڪ لاڳاپن کي بهتر بڻائيندو پر پاڪستان سميت سڄي دنيا جي وفدن، ڪاروباري نمائندن، دفاعي عملدارن ۽ هٿيار ٺاهيندڙن ۾ واپاري لاڳاپن کي پڻ بهتر بڻائيندو. هن اها ڳالهه ٻارهين عالمي دفاعي نمائش ۽ سيمينار- اسٽيئرنگ ڪميٽي آف آئيڊياز 2024 جي ٽئين اجلاس کي خطاب ڪندي چئي. اجلاس ۾ صوبائي وزيرن، ڊي جي ڊي پي او ميجر جنرل اسد نواز خان هلال امتياز (ملٽري)، چيف سيڪريٽري آصف حيدر شاهه، وفاقي وزيرن، صوبائي حڪومتن، هٿياربند فوج، قانون لاڳو ڪندڙ ادارن ۽ ٻين شرڪت ڪئي. اجلاس ۾ وڏي وزير چيو ته ٻارهين آئيڊياز 2024ع جي انعقاد لاءِ تفصيلي انتظامن کي حتمي شڪل ڏني وڃي. آئيڊيا 2024 جو انعقاد 19 نومبر کان 22 نومبر تائين ڪراچي ايڪسپو سينٽر ۾ ٿيندو. مراد علي شاهه چيو ته آئيڊياز 2000ع ۾ شروعات کان وٺي قومي ۽ عالمي دفاعي صنعت لاءِ سنگ ميل بڻجي چڪو آهي. هر ٻن سالن بعد منعقد ٿيندڙ هيءَ نمائش جديد ٽيڪنالاجيءَ جي نمائش ۽ ڄاڻ جي مٽاسٽا سبب پاڪستان توڙي ٻاهرين ملڪن ۾ تيزي سان مقبوليت ماڻي آهي. وڏي وزير چيو ته آئيڊياز هاڻي سڄي دنيا ۾ مشهور آهي. اهو اسان جي بين الاقوامي ڀائيوارن سان اسان جي گهري ۽ باهمي طور تي فائديمند ڳانڍاپن جي علامت آهي. ڪانفرنس عالمي امن، استحڪام ۽ خوشحالي جي لاءِ هڪ گڏيل پليٽ فارم فراهم ڪري ٿي جتي پرڏيهي وفد، دفاعي ڪمپنيون ۽ عوامي راءِ جا نمائندا اڄ جي دفاعي ۽ سيڪيورٽي چئلينجن تي بحث ڪرڻ لاءِ گڏ ٿين ٿا. وڏي وزير چيو ته محتاط رٿابندي ۽ غير محسوس انتظامن جي اهميت گهڻي وڌي وئي آهي. اڄوڪو اجلاس اهم آهي ڇوته اها اسان کي مختلف ادارن ۽ کاتن پاران مهيا ڪيل رٿابندي کي همٿائڻ ۾ مدد ڪندي. آئيڊياز 2024 جي ڪامياب انعقاد لاءِ توهان جو اجتماعي عزم ۽ سهڪار انتهائي اهم آهي جيڪا پوري پاڪستان جي ڪاميابي هوندي. هن يقين ڏياريو ته سندس حڪومت هن غير معمولي نمائش جي انعقاد لاء هر قسم جي مدد فراهم ڪندي. ڊائريڪٽر جنرل ڊي پي او ميجر جنرل اسد نواز خان هلال امتيار (ملٽري) دفاعي حڪمت عملي جي هن اهم ترين نمائش جي قومي سطح جي تيارين جي ٻئي سيشن جي صدارت ڪئي. ملاقات دوران کيس مختلف صوبائي کاتن، هٿياربند فوج ۽ قانون لاڳو ڪندڙ ادارن پاران انتظامي، سيڪيورٽي ۽ امدادي منصوبن تي عملدرآمد بابت بريفنگ ڏني وئي. سيشن جي پڄاڻي تي ڊي جي ڊي پي او چيو ته روايت موجب ان تقريب ۾ جديد دفاعي ٽيڪنالاجي جي نمائش، بين الاقوامي سيمينار، ثقافتي شو، واپارين جي ٻه طرفي ۽ واپارين جو حڪومت سان رابطي سميت ڪيتريون ئي قابل ذڪر سرگرميون شامل آهن. هن اهو پڻ اعلان ڪيو ته ڪراچي جي شهرين لاءِ خاص ڪراچي شو 21 نومبر 2024 تي نشان امتياز سي وي يو تي منعقد ڪيو ويندو. اجلاس جي پڄاڻي تي اوينٽ مئنيجر سي اي او بدر سوليوشنز ظهير نصير چيو ته آئيڊياز 2024 کي پاڪ فوج، وفاقي ۽ صوبائي حڪومتن ۽ قانون لاڳو ڪندڙ ادارن جي سهڪار سان سٺي نموني سان منظم ڪيو ويندو. اجلاس دوران سمورن سرڪاري تنظيمن ۽ ادارن آئيڊياز 2024 جي ڪامياب انعقاد لاءِ ڀرپور سهڪار جو عزم ڪيو.
