نوشھروفيروز(مشتاق مري) سنڌ اسيمبلي جي اسپيڪر آغا سراج دراني چيو آهي ته پ پ ۾ ڪو فارورڊ بلاڪ ناھي، ڪو بيوقوف ئي ھوندو جيڪو پ پ ۾ اختلافن بابت سوچي ٿو. نوشھرو فيروز ۾ پٺاڻ برادري جي اڳواڻ اياز پٺاڻ سان سندس والدھ جي وفات تي تعزيت ڪرڻ بعد ميڊيا سان ڳالهائيندي چيو ته پ پ چيئرمين بلاول جي اڳواڻي ۾ متحد آھي. هن چيو ته مشرف جي فيصلي تي نه ڳالهائيندس ڇاڪاڻ ته اهو عدالتي مسئلو آهي ۽ هو عدالت جي معاملن تي نه ڳالهائيندو آهي ۽ هو عدالت جو احترام ڪندو آهي. هن چيو ته پ پ جي حڪومت وفاق ۾ هجي يا سنڌ ۾ هجي پر سنڌ جي حقن تي ڪڏهن به سوديبازي نه ڪئي ويندي. وفاق سنڌ جا وسيلا کائي رهيو آهي پر سنڌ ۾ نه گئس آهي نه بجلي آهي. هن چيو ته سندس آزادي ڊيل جو حصو ناهي پر نوازشريف ۽ آصف زرداري جي آزادي اهليت ۽ بيماريءَ جي بنياد تي ٿي آهي. هن چيو ته هو نيب جي ڪيسن کان نه ٿو ڊڄي هن جا حوصلا اڳ جيان مضبوط آهن مهانگائي عوام جو جيئڻ حرام ڪري ڇڏيو آھي جيئن ئي عمران خان جي حڪومت آئي ته مهانگائي عوام کان رڙيون ڪڍرائي ڇڏيون آهن. هن وقت ذاتي ۽ برادري جي دوري تي آيو آهيان ۽ سنڌ ۾ جتي به پٺاڻن سان مسئلو ٿيندو هو اتي پھچي ويندو ۽ ڪنهن به پٺاڻ سان ناانصافي ٿيڻ نه ڏيندو. هڪ سوال جي جواب ۾ هن چيو ته سول اسپتال نوشهروفيروز کي اپ گريڊ نه ڪرڻ ۽ ٽائون ڪميٽي کي ميونسپل جو درجو نه ملڻ بابت هو هتان جي چونڊيل نمائندن ۽ سنڌ جي وڏي وزير سان ڳالھائي مسئلو حل ڪرائيندو.
