اسلام آباد(بيورو رپورٽ)پاڪستان جي وزيراعظم شهباز شريف چيو آهي ته مان ايران ۽ قازقستان کي شنگهائي تعاون تنظيم (ايس سي او) جو ميمبر بڻجڻ تي مبارڪباد پيش ڪريان ٿو. شنگهائي تعاون تنظيم جو ساليانو ورچوئل اجلاس ڀارت ۾ جاري آهي، جنهن کي پاڪستان جي وزيراعظم ميان شهباز شريف ويڊيو لنڪ تي خطاب ڪيو. سندس چوڻ آهي ته هر قسم جي دهشتگردي جي مذمت ٿيڻ گهرجي، رياستي دهشتگردي ۾ بيگناهه ماڻهن جو قتل انتهائي قابل مذمت آهي. وزيراعظم شهباز شريف چيو ته پاڪستان دهشتگردي جي خاتمي لاءِ بيشمار قربانيون ڏنيون آهن، خطي ۾ پائيدار امن لاءِ تنظيم جي سمورن ميمبر ملڪن جي ذميواري آهي.هن چيو ته عالمي برادري افغانستان جي مدد لاءِ اڳتي اچي، پرامن ۽ مستحڪم افغانستان خطي ۾ معاشي استحڪام جو سبب بڻجندو.وزيراعظم شهباز شريف جو چوڻ آهي ته ايس سي او افغانستان ڪوآرڊينيشن گروپ اهم ڪردار ادا ڪري رهيو آهي، عالمي مسئلن لاءِ عالمي اتحاد ضروري آهي.
