ايران نواز شدت پسند گروپ جي سرگرمين تي پابندي لاڳو

اسلام آباد(بيورو رپورٽ) پاڪستان جي حڪومت ايران نواز شدت پسند گروپ ’زينبيون برگيڊ‘ جي ملڪ ۾ سرگرمين تي پابندي مڙهي ڇڏي آهي. وفاقي حڪومت پابندي مڙهيل تنظيمن جي لسٽ ۾ هن گروپ کي 29 مارچ تي جاري ڪيل ليٽر ذريعي شامل ڪيو آهي، جنهن بعد پاڪستان ۾ پابندي مڙهيل تنظيمن جو انگ 79 ٿي ويو آهي. وائيس آف آمريڪا جي رپورٽ موجب هي گروپ پاڪستاني نوجوانن کي ڀرتي ڪري شام جي صدر بشار الاسد جي مزاحمتي گروپن ۾ شامل ڪري رهيو هو. شام ۾ 2011 کان جاري گهرو جنگ لاءِ ايران مزاحمتڪار ڀرتي ڪري موڪليندو رهيو آهي. هن گروپ کي آمريڪا 2019 ۾ دهشتگرد گروپ ڊڪليئر ڪري مٿس پابندي مڙهي هئي. سنڌ حڪومت هن گروپ جي هڪ شدت پسند کي 2019 ۾ ان وقت گرفتار ڪيو هو جڏهن مفتي تقي عثماني تي حملي ٿيو هو گرفتار جوابدار ان حملي ۾ ملوث هو. مفتي تقي عثماني تي ٿيل حملي ۾ هو پاڻ ته محفوظ رهيو هو پر سندس 2 سيڪيورٽي گارڊ مارجي ويا هئا ۽ سندس هڪ ساٿي مولوي زخمي ٿي پيو هو. پاڪستان جيڪو خود فرقيواريت جو وڏو شڪار رهيو آهي ۽ هزارين ماڻهو ماريا ويا هئا. چوڻ لاءِ ته ايران ۽ پاڪستان برادر مسلمان ملڪ آهن پر هلندڙ سال جنوري ۾ ايران پاڪستان ۾ شدت پسندن جي ٺڪاڻن تي ميزائيل حملو ڪيو هو ۽ پاڪستان 24 ڪلاڪن کان به گهٽ وقت ۾ ايران جي اندر شدت پسندن جي ٺڪاڻن تي بمابري ڪئي هئي. جنهن بعد ٻنهي ملڪن ۾ ڇڪتان وڌي وئي هئي پر روس ۽ چين جي ڪوششن سبب ان ٻنهي ملڪن فوري ڪنٽرول ڪيو هو. جنهن بعد سفارتي لاڳاپا بحال ڪيا ويا ۽ ايراني وفد پاڪستان جو دورو به ڪيو هو. 11 اپريل خميس تي صدر آصف علي زرداري ايراني هم منصب ابراهيم رئيسي کي فون ڪري عيد مبارڪ ڏني ۽ جاري ڪيل بيان ۾ ڄاڻايو ويو آهي ته ٻنهي ملڪن کي درپيش سيڪورٽي معاملن ۾ معلومات جي مٽا سٽا ڪرڻ گهرجي. ياد رهي ته ايران ’فاطميون ڊويزن‘ نامي گروپ به ٺاهيو آهي جنهن ۾ گهڻي ڀاڱي افغان پناه گير شامل آهن، جن کي ڀرتي ڪري شام ۾ بشارالاسد جي ويڙهاڪن جي مدد لاءِ موڪليو هو ۽ هن گروپ کي به آمريڪا دهشتگرد گروپ ڊڪليئر ڪيو هو.

پهنجو تبصرو موڪليو