مورو(ن س)صدر آصف علي زرداري گڏيل ڪوششن ذريعي وفاق کي وڌيڪ مضبوط بڻائڻ تي زور ڏيندي چيو ته حڪومت چاهي ٿي ته پاڪستان معاشي ترقي ڪري۔
هن اهي ڳالهيون مورو شهر ۾ هڪ عوامي ميڙ کي خطاب ڪندي ڪيون، جتي هن مقامي معززن ۽ چونڊيل نمائندن سان ملاقات ڪئي ۽ گهرو وزير ضياالحسن لنجار جي رهائشگاهه تي هڪ ميڙ کي خطاب به ڪيو.
صدر چيو: “اسان گڏجي اسٽيبلشمينٽ جا هٿ مضبوط ڪنداسين، پنهنجا هٿ مضبوط ڪنداسين ۽ ملڪ کي مضبوط بڻائينداسين۔”
زرداري چيو ته ملڪ کي خوراڪ ۾ خودڪفالت يقيني بڻائڻ ۽ معيشت کي مضبوط ڪرڻ گهرجي ته جيئن پاڪستان وڌيڪ مستحڪم ۽ سگهارو بڻجي سگهي۔
هن حڪومت جي ان عزم کي ورجايو ته زراعت کي بهتر بڻايو ويندو، في ايڪڙ پيداوار وڌائي ويندي، آمدني ۾ اضافو ڪيو ويندو ۽ ماڻهن جي زندگيءَ جو معيار بهتر بڻايو ويندو۔
صدر چيو ته حڪومت عوام کي پيش ايندڙ مشڪلاتن کان آگاهه آهي ۽ انهن کي حل ڪرڻ لاءِ ڪم ڪري رهي آهي، جڏهن ته ايندڙ نسلن جي ڊگهي مدي وارن فائدن تي به ڌيان ڏنو پيو وڃي۔
هن چيو ته گوادر ۾ ترقياتي منصوبا بلوچستان ۽ سڄي ملڪ ۾ مثبت معاشي تبديلي آڻڻ جو سبب بڻجندا۔
زرداري وڌيڪ چيو ته سندس پارٽي 1973 جي آئين جي دائري اندر رهندي عوام کي بااختيار بڻائڻ لاءِ قدم کڻندي رهندي۔
ڀٽو خاندان جو ذڪر ڪندي هن چيو ته اڳوڻو ۽ وزيراعظم ذوالفقار علي ڀٽو، وزيراعظم بينظير ڀٽو، مرتضيٰ ڀٽو ۽ شاهنواز ڀٽو“پاڪستان خاطر شهادت قبول ڪئي”۔
هن وڌيڪ چيو: “اسان پاڪستان جي ڪري موجود آهيون۔”
پنهنجي تقرير دوران زرداري هندستان تي مسلمانن خلاف ظلم ڪرڻ جو الزام لڳايو ۽ چيو ته هندستاني ميڊيا تي پابندين سبب انهن معاملن بابت خبرون وڏي پيماني تي سامهون نٿيون اچن۔
هن چيو ته هندستاني وزيراعظم نريندرا مودي والاريل ڪشمير جي ماڻهن کي سندن حقن کان محروم ڪري ڇڏيو آهي۔
مئي 2025ع واري تڪرار کي ياد ڪندي زرداري چيو ته پاڪستان چئن ڏينهن واري فوجي ڇڪتاڻ دوران هندستان کي پنهنجي فوجي طاقت جو احساس ڏياريو، جنهن دوران هندستان جا اٺ جهاز ڪيرايا ويا۔
صدر وڌيڪ چيو ته پاڪستان هندستان جا 40 جهاز ڪيرائي سگهي پيو پر هن ڇڪتاڻ کان بچڻ کي ترجيح ڏني۔
