اسلام آباد(بيورو رپورٽ) بين الاقوامي مالياتي فنڊ (آءِ ايم ايف) چيو آهي ته پاڪستان مني لانڊرنگ اسڪيمن کي موثر طريقي سان روڪڻ ۾ ناڪام رهيو آهي.آءِ ايم ايف پنهنجي گورننس ۽ ڪرپشن ڊائگنوسٽڪ اسيسمينٽ رپورٽ مڪمل ڪري ورتي آهي، جيڪا هن مهيني جاري ٿيڻ جو امڪان آهي.ان حوالي سان ذريعن جو چوڻ آهي ته آءِ ايم ايف رپورٽ جي جاري ٿيڻ کان اڳ مسودو پاڪستاني حڪومت کي موڪلي ڇڏيو آهي. پاڪستان آءِ ايم ايف رپورٽ جي مشاهدن ۽ سفارشن جو جائزو وٺندو.آءِ ايم ايف رپورٽ ۾ چيو ويو آهي ته پاڪستان جي فائديمند ملڪيت جي نظام جي اثرائتي عمل درآمد ۾ وڏيون خاميون آهن، ادارن جي وچ ۾ فائديمند ملڪيت جي ڊيٽا جي تبادلي جو ڪو به ثبوت ناهي، جڏهن ته پاڪستان مني لانڊرنگ اسڪيمن کي اثرائتي طريقي سان روڪڻ ۾ به ناڪام رهيو آهي.رپورٽ موجب جعلي ڪمپنين کي ڊيٽا کان سواءِ سرڪاري ٺيڪا حاصل ڪرڻ کان روڪڻ ڏکيو آهي، ايس اي سي پي، اسٽيٽ بينڪ، ايف بي آر جي وچ ۾ رابطو جاچ ۾ ڪمزور آهي، جڏهن ته ڪمرشل بينڪن ۽ جاچ ايجنسين جي وچ ۾ رابطي جو به فقدان آهي.آءِ ايم ايف رپورٽ ۾ چيو ته ڪمرشل بينڪن ۽ جاچ ايجنسين جي وچ ۾ رابطي جو به فقدان آهي، جڏهن ته قانون سازي ۽ بين ايجنسي رسائي ۾ ڪمزوريون ان کي اثرائتو ٿيڻ نه ٿيون ڏين.آءِ ايم ايف ذريعن موجب، ڪمپنين جي فائديمند مالڪن جي ڊيٽا کي اثرائتي طور تي استعمال نه ڪيو پيو وڃي، مالي جاچ ۾ ايجنسين جي وچ ۾ باقاعده تبادلو ناگزير آهي ڇاڪاڻ ته پاڪستان جو فائديمند مالڪي فريم ورڪ بنيادي اهميت جو حامل آهي.ان کان علاوه، آءِ ايم ايف ڊيٽا جو جائزو وٺڻ لاءِ هڪ ادارتي ورڪنگ گروپ جي قيام جي تجويز پڻ ڏني آهي.
